Read lugbara Zaburi 145 Bible Online

Zaburi 145 - lugbara bible

Zaburi 145

¹Ma nga mi inzi, Mungu mani, Opi Amboru la, azini ma nga ru mini inzi etuzu ’dani ’dani.

²Ma nga mi inzi etu dria, ma nga mi ru inzi etuzu ’dani ’dani.

³Yehovani ambo, onyiruni ’ba ma inzi eri tu; ’ba econi ambo erini nizaru ku.

⁴Atipi nga azi mini inzi anzi yini ma tia, yi nga yi dri ’yeta okporu mini ’diyi ece.

⁵Ma nga asisile dro diza mini opiniri pi ma dria inzita mini pie, ’yeta osutaru mini ’diyi pie dria.

⁶Te ’ba yi nga ’yeta mini uri fepi ’ba dri ’diyi ma okpo ma e’yo o’yo, azini ma nga ambo miniri ma e’yo olu.

⁷Yi nga onyi mini amboruri ma e’yo eku azini yi nga e’yo kililiru miniri ngo.

⁸Yehovani asi ndriza be, eri ga yikisi tre, ’bani adra mbele ku, yiki aleru eriniri amboru tu.

⁹Yehovani ’ba dria ’ye onyiru, yiki eriniri ovu azi erini ’yele ’diyi vusi dria.

¹⁰Azi mini ’yele ’diyi dria nga awa’dia ’yo mi dri, Yehova la, azini ’ba alatararu mini ’diyi nga mi inzi ra!

¹¹Yi nga suru miniri ma diza ma e’yo olu, yi nga okpo mini ma e’yo ’yo,

¹²’yeta mini amboru ’diyi pi ecezu anzi ’bani dri, suru mini ma diza opiniri be.

¹³Suru mini eri suru ’dani ’daniri, opi mini nyaleri ovu a’bianzi vusi dria.

¹⁴Yehovani ’ba dria e’depi va ’diyi edre, eri ’ba dria avupi va ’diyi enga.

¹⁵Mile ’ba driani ovu mi vu mi tezu, mi yi dri nyaka yini fe ewu vusi.

¹⁶Mi dri mini anda ra, mi afa idriru ’diyi ma abiri de dria.

¹⁷Yehovani onyiru geri erini vusi eri asi ndriza be ’yeta erini vusi dria,

¹⁸Yehovani ’ba dria owupi vunia ’diyi vu ogogo, eri ’ba dria owupi vunia asi adarusi ’diyi vu ogogo.

¹⁹Eci nga e’yo ’ba eri rupi ’diyini leleri ’ye ra, eri nga wuta yini eri, nga yi opa ra.

²⁰Yehovani ’ba dria eri lepi ’diyi ma ta mba ra; te eri nga ’ba onzi ’diyi dri ja dria.

²¹Ma tileni nga Yehovani inzi, ’ba rua ari be ’diyi dria ma inzi ru erini alatararuri ’dani ’dani.