Read lugbara Zaburi 147 Bible Online

Zaburi 147 - lugbara bible

Zaburi 147

¹Emi inzi Yehovani! A’disiku eri onyiru ongo ngozu Mungu amani inzizu; inzita fezu ’diniri aluzaru tu.

²Yehovani Yerusalemuni si dika; eri ’ba Israelini ndra yi erepi ’diyi oku tualu.

³Eri ’ba yi asi nyopi ra ’diyi ati, eri ebi yini ombe.

⁴Eri ’bi’bio ma kalafe la, eri yi omve dria rusi rusi.

⁵Opi amani eri ambo, okpo erini aga ra; e’yo vaza erini ma kalatini asizuri yo.

⁶Yehovani ’ba asi e’yere be ’diyi edre, eri ’ba onzi ’diyi o’be va nyakua.

⁷Emi ngo ongo Yehova dri awa’difo be; emi ngo ongo Mungu amani inzizu 0’disi!

⁸Eri ’bu a’bu iritisi ci, eri ozoo ede nyaku dri, eri fe aseni duzu oni dria,

⁹Eri nyaka fe anyapa piyi dri, koreke anzi owupi ’diyi be.

¹⁰Eri ovuni ayikosi akanya ma okposi ku, pa ’bani feni eri dri ayiko ku;

¹¹te Yehova ovu ayikosi ’ba eri rupi, ’ba eri ma yiki aleruri tepi asi tezasi ’diyisi.

¹²Mi inzi Yehovani fo, Yerusalemu la! Mi inzi Mungu mini fo, Zioni la!

¹³A’disiku eri ’ba kalitile mini ma katala okporu; eri fe asi ndriza anzi mi alia ’diyi dri ra,

¹⁴Eri asi anzuru ’ba angu mini ma eselia; eri fe mini trazu anya onyiru agapi turisi.

¹⁵Eri azita ini ma ti pe wudrikuru dria; e’yo erini nzu mbele tu.

¹⁶Eri si talujiruri fe ekile kabilo ’biko emverurile; eri andrali emveru ovupi sileri ere ekile ofutale.

¹⁷Eri si ini ada ekile ’bani tibi awalerile; a’dini eco pa sozaru egbe erini ma aliani ya?

¹⁸Eri e’yo ini ti pe, sini ecazu ani yiru; eri fe i ma olini lizu, yini razu beni.

¹⁹Eri e’yo ini ece Yakobo dri, eri azita sile ini ’diyi pi ece Israeli dri e’yo liza ini ’diyi be.

²⁰Eri ’yeni ’dini suruti azini vu aluni ku; yi nini e’yo liza erini ’diyi ku. Emi inzi Yehovani!