Read lugbara Zaburi 148 Bible Online

Zaburi 148 - lugbara bible

Zaburi 148

¹Emi inzi Yehovani! Emi inzi Yehovani ’bua ’dale, emi inzi eri angu uruleruria!

²Emi inzi eri, emi malaika erini ’diyi dria, emi ma inzi eri, emi asikari ongulumuru erini ’diyi dria!

³Emi ma inzi eri, emi etu pi mba be, emi ma inzi eri, emi ’bi’bio dipi ’diyi dria!

⁴Mi ma inzi eri, mi ’bu ’bu ma driliari, aziru emi yi ovupi ’bu ma drilia uru ’diyi!

⁵Afa ’diyi dria ma inzi ru Yehovani! A’disiku eri azi ndra e’yoni ra, afa ’diyi ovu ’bazaru ani.

⁶Eri ’ba yi pa osozu okporu ’dani ’dani; eri fe azita ngapi i depi kuri.

⁷Emi ma inzi Yehovani nyakua ’doa, emi anyapa ambo ambo yi alia ’diyi, miri aliru ’diyi be dria indi.

⁸Aci pi si be, si emve talujiruri pi afurusa be, akuluku azita erini ’yepiri.

⁹oni ambo ambo ’diyi, oni were ’diyi be dria, pati efi ’yapi ’diyi pi mario be dria;

¹⁰anyapa asea ’diyi, anyapa akua ’diyi be dria, afa acipi agatisi ’diyi pi aria osapi uru ’diyi be;

¹¹opi wudrikurua ’diyi pi suru be dria, ’ba opiru ’diyi pi ’ba e’yo lipi nyakua ’diyi be dria;

¹²karile pi ezoanzi be indi, ’ba deza piyi anzi nyiri be;

¹³vi dria dria ma inzi ru Yehovani, ru erinirini ovule uru tu a’dulerisi; diza erini ovu nyaku pi ma drilia uru ’bu be.

¹⁴Eri enga o’yu uru ’ba ini ’diyi dri, ongo inzitani ’ba alatararu ini ’diyi dri dria, adaru ’ba Israelini suru ovupi ogogo eri vuri dri. Emi inzi Yehovani!