Read lugbara Zaburi 17 Bible Online

Zaburi 17 - lugbara bible

Zaburi 17

¹Mi eri e’yo ovupi kililiruri, Yehova; mi ega wuta mani ma e’yo fo! Mi co bile zita mani efupi tile inzo kokoruriasiri erizu fo

²E’yo liza ma dria ’yekeri ma efu mivu! Mi fe mi mile ma ndre e’yo kililiruri’i!

³Mi o’bi ma asi ’bo, mi andri ma inisi ra, mi o’bi ma, te mi isuni e’yo ku; ma ede ma asi ’bo kini ma ngani eza tisi ku.

⁴Azi ’bani ma e’yosi, e’yo efupi mi tiliarisi ma ona ma ’ba e’yo ’yepi eganasi ’diyi ma gerisi ra.

⁵Mani aciria ma pa ebi yi ’dani leti mini ma alia ra, pa mani nzoni ku.

⁶Ma wu mi vu ra, Mungu, mini ngale e’yo omvile ma tiarisi; mi co bile ma vu fo, mi eri e’yo mani ’yoleri indi.

⁷Mi ma ece leta mini yiki be osutaruri fo! Mi’i, mi ’ba nzupi mi vu yi pazu ’diyi opapiri la, mi adri yi pa dri ndi minirisi ’ba engapi yi ma ruaa ombasi ’diyi dri.

⁸Mi mba ma ta mile ma efile fo; mi ica endri opile mini ma etiara,

⁹’ba onzi ma ezapi ’diyisi, ari’ba mani lepi ma fupi ma acepi kuru ’diyisi.

¹⁰Oso yini ombe asi yini ci, yi ma tilesi yi e’yo ’yo afuru.

¹¹Yi obi ama pamvu; yi ace di ama kuru ’bo; yi mile ’ba okporu ama ’bezu va nyakua.

¹²Yi si ekile kami lepi afa erini cileri nyapi ekperesirile, ekile kamimva afa mbapi pari zizaruarile.

¹³Mi enga, Yehova la Mi oga eri ma geri eri ’bezu va! Mi ari idri mani ’ba onzi ’diyi dri sei minirisi;

¹⁴mi ari ma ’ba dri mi drisi fo, Yehova la, ’ba nyaku ’dirini afa yini a’ipi idri ’diri ma alia ’diyi dri. Yi ’ba mini fele yi ma ale ma tra lonyi minisi ’diyi; yi oti anzi fudri ci; yi ku anyapa yini jolokoru ma ovu anzi yini dri.

¹⁵Te ma’i, ma nga mi mile ndre onyi alia; mani ngaria oruria, mani wura mini ndrezuri nga ovu ma dri ayikoru fudri ci. (’Ba ongo dri cepiri dri. Zaburi Daudi ati’bo Yehovanirini. Eri ’yo e’yo ongo ’dirini ’diyi Yehova tia etu Yehovani eri arizu ari’ba erini dria dri, Saulo dri indirisi. Eri ’yo ’dini:)