Read lugbara Zaburi 19 Bible Online

Zaburi 19 - lugbara bible

Zaburi 19

¹’Buni diza Munguniri e’dani; angu ’buari vini azi eri ma drini ’yeleri ece.

²Etuni e’yoni olu etu aziniri be, inini vini e’yo nitani nze ini aziniri ma tia indi.

³’Yota kani ti ’yoza yo; o’duko yini ’ba econi erizaru bilesi ku;

⁴te imbata yini efu nyaku drisi dria, e’yo yini ’yole ’diyi mu troa nyaku ma kalatini asizuria. ’Bu nde ma alia eri ’ba bere etuni ovuzuri’i;

⁵etu nde ovu ekile izio erini efuria jo eriniarile, ovuzu ayikosi ekile ’ba okpo be erini ongu nzuriarile.

⁶Fuza erini ibi enga ’bu ma tia, te acita erini ovu kpere ’bu ma ti aziniria indi; afa aluni ovupi zizaru driza erinisini yo.

⁷Azita Yehovaniri kilili, e’yo onzi kokoru, orindi ’bani atizu; e’yo eti nzeza Yehovaniri adaru, ’ba ondua kokoru ’bazu onduaru;

⁸azita Yehovani imbale ’diyi yi ’yeke, ayiko fezu ’ba ma asia; e’yo aziza Yehovani eri alatararu, mile ’bani ’izu;

⁹ruta Yehovani ruzuri alaru, ovuzu ’ dani ’ dani; e’yo liza Yehovani yi adaru azini kililiru dria dria.

¹⁰Ava yini aga ava meleni ra, ada, mele onyi be kakau agazu; yi aluzaru aga anyuoso ra, aga anyusoro ra.

¹¹Azinisi vini azita nde ’diyi adri ati’bo mini imba ra ’ba ka yi ma ta mba ra, yi nga ani orodri isu amboru.

¹²Eco a’dini i ma ezata amazaruni ya? Mi ma oji ma alaru e’yo onzi mani ’yele ndindiru ’diyisi.

¹³Mi ku ati’bo mini ma ’ye e’yo onzi atrisi ku; mi fe e’yo onzi nde yi ma ovu opiru ma drilia ku! Ma nga di ovu kililiru ani, ma nga ovu alaru, e’yo kokoru, e’yo onzi amboruni ovuzu ma dria ku.

¹⁴Mi fe e’yo mani ’yole tisi ’diyi, e’yo osuza mani egale ma asia ’diyi be ma ovu a’izaru mi milia fo, Yehova, kata maniri, ’ba ma onzepiri la!