Read lugbara Zaburi 20 Bible Online

Zaburi 20 - lugbara bible

Zaburi 20

¹Yehova ma omvi e’yo mi tia etu candinirisi! Mungu Yakoboniri ma ru ma ’ba mi uru!

²Eri ma ko mi aza engazu pari! alatararuria, eri ma fe okpo mi dri engazu Zionia!

³Eri ma ega afa edeza mini ’diyi dria ma e’yo, eri ma a’i edeta mini vele ’diyi indi!

⁴Eri ma fe mi dri e’yo mi asini leleri, eri ma ’ye e’yo mini otule mi asia ’diyi dria!

⁵Ama nga aga ayikosi pata mini ma alia, azini Mungu amani ma rusi ama nga bendera amani enga uru! Yehova ma ofe e’yo mini zile ’diyi dria!

⁶Ma ni curu’do kini Yehovani adri ’ba erini odu osule driniari pa ra; eri nga e’yo omvi eri tia engazu ’bu erini alatararuri ma alia, ’ba pazu dri ndi eriniri ma okposi.

⁷’Ba azini ’ba asi yini gari ombani ma dria, ’ba azini a’i yini akanyani; te ama’ini ama nga ru Yehova Mungu amanirini omve’i.

⁸Yi’i, yi avu va, yi o’de ra; te ama’iruni, ama enga ra pa sozu urulesi.

⁹Mi pa ama, Yehova; Opi ma omvi e’yo ama tia amani eri omveria.