Read lugbara Zaburi 25 Bible Online

Zaburi 25 - lugbara bible

Zaburi 25

¹Yehova la, ma asi mani enga rru vu.

²Mungu mani la, ma ’ba ma asi mi a’izu ’bo, mi ma ku ma drinza isuzu ku; mi ku ari’ba mani ma aga ma ku.

³Ada, ’ba mi tepi ’diyi ma aluni ngapi drinza isupini yo; ’ba lokiri ’bapi e’yo kokoru ’diyi nga drinza nya yi’ini.

⁴Mi ece leti mini ’diyi ma dri fo, Yehova la; mi imba ma geri mini nizu.

⁵Mi ce ma dri e’yo adaru miniri ma alia, mi imba ma indi, mini ovule Mungu pata mani fepiri’irisi; ma mi mile ga etuzu etuzu,

⁶Yehova la, mi ega asi anzuru mini, yiki aleru miniri be fo, yini ovule ’dani engazu andra driorisi.

⁷Mi ega e’yo onzi mani ’yele de ma karilauru ’diyi ezata mani ’diyi be ku; te mi ega e’yo maniri leta mini yiki beri vusi, onyi mini ma e’yosi fo, Yehova la!

⁸Yehovani onyiru, kililiru indi; e’yo ’dirisi eri nga ’ba e’yo onzi ’yepi ’diyi imba geri adari nizu.

⁹Eri nga ’ba e’yere ’diyi ma dri ce e’yo liza kililirurisi, eri nga ’ba e’yere ’diyi imba geri inirisi.

¹⁰Leti Yehovani dria ovu yiki aleruri pi e’yo adaruri be, ’ba e’yo aziza erini pi ma ta mbapi e’yo eti nzeza erini be ’diyi dri.

¹¹Mi ma wu ezata mani mi ma rusi fo, Yehova, ezata nderini ovule amborurisi.

¹²’Ba Yehovani rupiri a’di’i ya? Eri nga ’ba nderi imba geri ini pelerisi.

¹³Eri ma ngulupini nga adri drilebaru, anzi eri ma oriru ’diyi nga angu nya awurusoru.

¹⁴E’yo zizaru Yehovani ovu ’ba eri rupi ’diyi be ci, eri nga e’yo aziza erini azileri ece yi dri.

¹⁵Mile mani lu Yehova vu ’dani, erini ngale ma pa onzele emba ma aliarisi.

¹⁶Mi ma eco mi ti ma vuleru, mi ovu ma vu yikisi; ’bani ma kule a’dulerisi, azini yini ma inzalerisi,

¹⁷Candi ovupi ma asiari oga i si; mi ma nze ma engazu asi otiza mani ma aliasi fo!

¹⁸Mi ega inzata mani pi ma e’yo rua suza mani be, mi wu ezata mani dria indi fo!

¹⁹Mi ega ari’ba mani ma e’yo, yini ovule karakaraurisi, yi vini ma ngu nguta yiki kokorurisi.

²⁰Mi mba idri mani ma ta fo, mi ari ma indi; mi fe ma ovu drinzasi ku, mani mi a’ile rarisi.

²¹Mi fe e’yo adaruri pi ma mba ma ta e’yo kililiruri be, mani mi tele terisi.

²²Mi onze Israeli dika fo, Muogu la, engazu candi yini ma aliasi dria.