Read lugbara Zaburi 31 Bible Online

Zaburi 31 - lugbara bible

Zaburi 31

¹Ma nzu mi vu ma pazu, Yehova; mi ku ma drinza isuzu ku fo; mi ari ma onyi minirisi!

²Mi co mi bile ma vu fo, mi ari ma mbeleru! Mi ma ovu ma dri kata amboru, pari okporu mani ma pazuriru!

³Mini ovule oni mani azini pari okporu manirisi; e’yo ’disi ru mini ma e’yosi mi ma bi ma dri ma dri cezu.

⁴Mi nze ma emba yini ’bele ma dri zizaruri ma aliasi, mini ovule pari okporu mani ma ta mbazurisi.

⁵Ma ku orindi mani ma ta mbazuri mi dri; mi onze ma ’bo, Yehova, mi Mungu e’yo adari beri la!

⁶Ma ngu ’ba e’yo toko toko inzoru egapi ’diyi onzi; te ma ’ba ma asi Yehovani a’izu.

⁷Ma nga ovu ayikosi nyona be Yiki mini ale berisi, mini inzata mani ndrele ’borisi, mi ni candi ma asiari ra,

⁸mi kuni ma ari’ba mani ma dria ku; mi ’ba ma pa pari walaru ma alia ’bo.

⁹Mi ovu ma vu yikisi, Yehova, mani ovule candi ma aliarisi; mileefi mani ondri ondri imvosi ada, orindi mani oyi oyi rua mani be dria.

¹⁰Te mani dri cile idri mani ma alia candi berisi, eli mani de yi mani otalerisi; okpo mani ’ye de de e’yo onzi mani ma e’yosi, fala mani ondri vini teketeke.

¹¹Ari’ba mani dria ma e’yosi e’yo mani eca ajidiraru, ada, ’ba ma aku ejelea ’diyi ovu drinza be masi tu, ma ofu afa uri fepiriru ma agyi dri indi; ’ba ma ndrepi amve ’diyi yi apa masi apa apa.

¹²E’yo mani avi ’ba dri ra ekile yini ’ba draza ma e’yo egale kurile; ma ovu ekile imvu i afupi ’borile.

¹³Ma eri ’ba kakauni ma aji diriauri bi ma tu kala driasi yini e’yo amaria tualu e’yo otuzu ma ruaa, yi nda geri idri mani fuzu kai.

¹⁴Te ma ovu a’itasi mi vu, Yehova la, ma ’yo ra, Mi Mungu mani.

¹⁵Ewu mani ovu mi dria; mi ma pa ma ari’ba mani ma dria, ’ba ma inzapi ’diyi ma dria indi!

¹⁶Mi fe mi andreti ma di ati’bo mini vu dizaru; mi pa ma leta mini yiki berisi!

¹⁷Mi ku drinza ma bi ma ku fo, Yehova, mani wule mi vu rarisi; mi ku drinza ma bi ’ba onzi ’diyi, mi ku yi ma ovu ciri Pari ’ba drazaniria.

¹⁸Mi ma ombe ’ba inzo lipi ’diyi ma ti ci, yi ma ’yo e’yo ku; yi ’ba e’yo ’yopi ambosi ’ba onyiru ’diyi ma ruaa, afusi, e’yo yini edepi ede ’diyi.

¹⁹Onyi mini, mini tani mbale ’ba mi rupi ’diyi dri, mini edele anzi ’bani ma milia ’ba asi ’bapi mi a’izu ’diyi driri ovu amboru ’doni ya!

²⁰Mi nga yi ma ta mba zizaru pari mini ovuzuria ’ba e’yo onzi otupi yi ruaa lokirisi ’diyi ma e’yosi; mi nga yi ma ta mba zizaru hema mini ma alia andre agata gapi ’diyisi.

²¹Yehova ma ovu inzizaru, erini leta ini yoo be osutaruri ecele ma dri aku okporuri ma aliarisi.

²²Te ma’i, ma ’yo ti acisi mbele mbele kini, Nze ma mi miliasi ’bo! Te ti, mi eri o’duko mani ra, mani matu ’baria mi vu.

²³Emi ma le Yehovani avasi fo, emi ’ba erini ’bale alatararu ’diyi dria! Yehovani ’ba asi adaru be ’diyi ma ta mba ra, te eri panga ofe fudri ci tu ’ba ’yepi afusi ’diyi dri.

²⁴Emi ma ovu di okpo be, asi emini ma te te, emi ’ba Yehovani tepi ’diyi dria!