Read lugbara Zaburi 32 Bible Online

Zaburi 32 - lugbara bible

Zaburi 32

¹’Ba Munguni ezatani wule ra, Munguni e’yo onzini zile rari ovu drilebaru.

²’Ba Yehovani e’yo onzini lale dika ku, ovupi lokiri kokoru asi ini ma aliari ovu drilebaru.

³Mani ndra adriria ciri, fala mani ondri ra wuta mani wule ’dani etuzu etuzuri ma e’yosi.

⁴Te etusi ini be rra, dri mini ovu ma ruaa nzizaru; yi ma ruaari nzu ra ekile etu kapi elisirisirile.

⁵Ma e’da ndra e’yo onzi mani mi tia, ma ocini azi onzi maniri ku; ma ’yo ndra, Ma nga di ezata mani e’da Yehova tia; ’mi wu ndra ani e’yo onzi mani ma ezata ra.

⁶E’yo ’disi ’ba Mungu inzipi ’diyi dria alu alu ma a’i mi tia etu yini ecozu mi isuzurisi; adaru, ewu yini tizu amborurisi yiniri ngani ca kpere eri vu ku.

⁷Mi ovu pari mani ma zizuri mi’i, mi nga ma pa candi ma alia; mi nga ma ace kuru ongo patani’diyisi.

⁸Ma nga mi imba ra, ma nga vini mi dri ce geri mini ngazu muzu aleniaria; ma nga mi dri ondua fe mani mi ndreria ma milesi.

⁹Te emi ma ovu ekile akanya kani akanya farasiru, ovupi asisile kokoru ’diyile ku; ’ba yi adri enyi ’ba yi ma ruaa, yi adri afa ayaru ombe yi tilia; ka’dini ku, yi ngani emu mi vu ogogo ku.

¹⁰Candi karakarau nga ovu ’ba onziri dri; te yiki aleruri nga ’ba i ma asi ’bapi Yehovani a’izuri ace kuruni.

¹¹Emi ovu ayikosi ambo Yehova alia nyona be, emi ’ba onyiru ’diyi, emi otre ayikosi, emi ovupi asi be kililiru ’diyi dria!