Read lugbara Zaburi 33 Bible Online

Zaburi 33 - lugbara bible

Zaburi 33

¹Emi ma ovu ayikosi Yehovasi, emi ’ba onyiru ’diyi! nzita fezuri si ’ba kililiru ’diyi si si.

²Emi ma fe awa’difo Yehova vu o’di cozasi, emi ma ngo ongo eri inzizu o’di ovupi baka be mudririsi!

³Emi ngo ongo o’diru eri dri, emi ma co o’di ondua be, o’duko urusi.

⁴A’disiku e’yo Yehovani ’yoleri eri kilili; eri ’ye azi ini dria asi adarurisi.

⁵Eri e’yo onyiruri pi le e’yo liza kililiruri be; nyaku ga leta yiki be Yehovanirisi tre.

⁶E’yo Yehovani ’yolerisi ’bu pi ’ba ndra yi ra, afa ongulumuru alenia ’diyi dria ’ba yi ava efupi eri tiliarisi.

⁷Eri oli yi mirini nguluru; eri mba yi aliru ma ta pari afa ta mbazuria.

⁸Nyaku dria ma ru Yehovani, ’ba angu wudrikuru drisi dria ’diyi ma ru eri inzitasi.

⁹A’disiku eri ’yo ndra e’yo, coti i e’yo nde ’ye ira; eri fe ndra azita, coti e’yoniri nga pa so ra.

¹⁰Yehova fe ’ba jururu ma ama e’yo oye; eri fe e’yo suru ndu ndu ’diyini otuleri ma eca toko.

¹¹E’yo Yehovani amaleniri pa so ci ’danini, asisile eri ma asia ’diyi ovu kpere a’ojanzi vusi dria.

¹²Suru Yehovani ’bapi Mungu yiniruri yi ovu drilebaru, ’ba erini pele i ma yilaru ’diyi.

¹³Yehovani lu engazu ’bua, eri anzi ’bani ne dria dria;

¹⁴eri ’ba ovupi nyakua ’diyi olu ra engazu pari ini adrizuria;

¹⁵eri asi yini dria ma wura edepi, ’yeta yini dria ma e’yo egapiri’i.

¹⁶Opi aluni i papi asikari o’biru ma e’yosini yo; ’ba okpo be turi pani i okpo ini amborurisi ku.

¹⁷Akanya econi ’ba pazaru dra ma sia ku, econi Vili erini ’ba aluni arizaru okpo ini amborurisi ku.

¹⁸Emi ndre, mile Yehovaniri ovu ’ba eri rupi ’diyi vu, ’ba yiki aleru eriniri tepi ’diyi vu,

¹⁹idri yini arizu dra ma alia, yi ma ta mbazu idriru liki amboru ma alia.

²⁰Orindi amani te Yehovani ra; eri ovu aza koza amani azini gombere amani.

²¹Te asi amani nga ovu ayikosi eri ma alia, amani asi ’bale ru erini alatararuri a’izu ’borisi.

²²Yiki aleru miniri ma ovu ama vu fo, Yehova la, amani mi a’ile asi tezasi ’borile.