Read lugbara Zaburi 34 Bible Online

Zaburi 34 - lugbara bible

Zaburi 34

¹Ma nga Yehovani inzi etu driasi; inzita erini nga ovu ma tilia ’dani.

²Asi mani nga i enya Yehovasi; ’ba e’yere ’diyi nga e’yo ’diri eri ra, yi nga ovu ayikosi ani.

³Ama ma ’ba Yehova ma ru ambo, ama emi be, ama ma edu eri ru tualu, eri ’bazu uru inzitasi.

⁴Ma nda Yehovani ra, te eri eri ma ani ra, eri pa ma e’yo uri fepi ma asia ’diyisi dria.

⁵Yi lu eri vu, eri fe diza yi dri; mile yini ngani ovu drinzasi aluni ku.

⁶’Ba candi be ’dori wu ra, te Yehova eri eri ani ra, eri pa eri candi erini ma aliasi dria.

⁷Malaika Yehovani ri ’ba Yehovani rupi ’diyi ma ageia kuru yi arizu.

⁸Emi ma o’bi nga ajini fo, vazu Yehovani anyiru! ’Ba i asi ’bapi eri a’izuri ovu drilebaru!

⁹Emi ru Yehovani fa, emi ’ba erini alatararu ’diyi, ’ba eri rupi ’diyi ngani wu afaakosi ku!

¹⁰Kamianzi ovu nyaka kokoru, yi la abirisi; te ’ba Yehovani ndapi ’diyi dri, afa onyiru yini ndrule tini yo.

¹¹Emi emu, anzi la, emi eri e’ya mani, ma nga di emi imba Yehovani ruzu.

¹²’Ba idri lepiri eri a’di’i ya? ’Ba ewu izu lepi eri ma ndre ani e’yo onyiruri a’di’i ya?

¹³Mi mba andre mini ma ta mi kazu e’yo onzi ’yozu ku, mi mba mi tile ma ta indi mi kazu e’yo lokiriru ’yazu ku.

¹⁴Mi ku e’yo onzi ja, mi ’ye e’yo onyiru; mi ma nda e’yo asi anzuruniri, mi ma bi vutini indio.

¹⁵Mile Yehovani ovu ’ba kililirui ’diyi vu, i bileni vini mgboru wuta yini i erizu.

¹⁶Andreti Yehovani ovu ’ba e’yo onzi ’yepi ’diyi vu ombasi, yi ma tavini avizu nyakuasi ani ra.

¹⁷’Ba kililiru ’diyi wu ra, te Yehova eri ra, ari yi candi yini ma aliasi dria.

¹⁸Yehovani ’ba asi nyozaru be ’diyi vu inyia, eri adri ’ba ovupi candisi asi ojapi ani ra ’diyi opa ra.

¹⁹’Ba kililiruri ma inzata yi karakarau; te Yehovani eri ari inzata dria ’diyi ma aliasini.

²⁰Eri adri falani ma ta mba dria ra; aluni nyoni i ku.

²¹E’yo onzini nga ’ba onzi ’diyi ofu ra; azini e’yo lizani nga ’ba ’ba kililiru ’diyi ngupi onzi ’diyi nde ra.

²²Yehovani orindi i ma ati’bani onze ra; te e’yo liza ngani vini ’ba nzupi eri vu yi pazu ’diyi ma aluni nde ku.