Read lugbara Zaburi 35 Bible Online

Zaburi 35 - lugbara bible

Zaburi 35

¹Mi fu afu, Yehova, la, ’ba afu fupi ma be ’diyi be fo! Mi ’di a’di ’ba a’di ’dipi ma be ’diyi be!

²Mi bi gombere pi enyi be, mi so pa ma aza kozu fo!

³Mi ma nze enyiriko aju siarisi ra, mi ase geri ’ba ma vuti dropi ’diyi dri ci! Mi ’yo orindi mani ma tia kini, Ma pata miniri ma’i!

⁴’Ba ma dra ndapi idri mani fuzu ’diyi ma nya drinza, ’ba ma ’ba yi ajidiraru i ’Ba e’yo otupi ma ruaa ma ’yezu onzi’diyi ma oja yi vile, ma eca toko indi!

⁵Yi ma ovu ekile anya drileko olini drolerile, malaika Yehovani ma odro yi ’dani!

⁶Geri yini ma ovu iniru azini onzokonzoru, malaika Yehovani ma odro yi vuti’dani!

⁷A’disiku yi zi emba yini ma dri ’bile alia e’yo kokoru; yi ga awi idri mani fuzu e’yo kokoru.

⁸Mi fe eri ma ja dri etu erini nizu kurisi! Mi fe emba erini zileri ma bi eri ma ngulupi’i; eri ma ’de alenia, ma ja dri ani!

⁹Ka’dini asi mani nga ovu ayikosi Yehova ma alia, ma asini riga ovu ayikosi tu pata erinirisi.

¹⁰Fala mani dria nga ’yo ra kini, Yehova, a’di ovu milenini ya? Mi’i ’ba alioru aripi ’ba eri agapi okposiri dri, adaru, ’ba alioru pi aripi ’ba afa kokoruri be, ’ba afa yini opapi okposi ’diyi ma driari’i.

¹¹’Ba e’yo eti nzepi asi onzisi ’diyi enga ra; yi zi ma tia e’yo mani nile ku ’diyisi.

¹²Yi e’yo onzi ofe e’yo onyiru mani ’yeleri ma paria, asi mani ecandizu,

¹³Te yi ka ovu azoru, ma su mani koliba candiniri’i, ma inza ma asi nyaka ’dazasi. Ma elu ma dri va ma agatia Mungu zizu,

¹⁴ma ’ye ndra ekile yi ovu ma agyile kani ma adrile; ma avu va awu be ekile ’ba lulu gapi i andrisirile.

¹⁵Te kumu ka ma sini, yi’i yi ovu ayikosi, yi oku yi tualu; ’ba sorosoroa mani nile ku ’diyi oku yi tualu e’yo ndazu ma ruaa, yi ri ma ovi ’dani, yi kuni ku;

¹⁶ekile ’ba ’ba o’dapi toko omu alia ’diyile, yi nya sikala ma vu.

¹⁷Yehova, mi nga pa so kalaa ndrezu etu si ya? Mi ari idri mani dri jata yini edele masiri ma aliasi, mi ari idri nde mani leleri kami ma eseliasi indi fo!

¹⁸Ma nga awa’difo fe mi dri okuza amboru ma alia; ma nga mi ru inzi ’ba yi okupi karakarau ’diyi ma eselia ra.

¹⁹Mi fe ’ba ovupi ma be ari’baru e’yo kokoru ’diyi ma ovu ayikosi ma dri inzazu ’ba ma ngupi onzi e’yo kokoru ’diyi ma obi mile yini obi obi masi ogutasi ku indi.

²⁰A’disiku yi ’yoni e’yo asi anzuruni ku, te yi e’yo lokiriru otu ’ba ovupi e’yere angua ’diyi ma ruaa.

²¹Adaru, yi zi yi ti walaru ma vu; yi ’yo ra, Ha! Ha! ama ndre e’yo nderi ama milesi ’bo!

²²Yehova la, mi ndre e’yo nderi mi’i ’bo; mi adri ciri ku fo! Yehova, mi ovu ma vusi re ku fo!

²³Mi enga, mi oro mi e’yo mani erizu, e’yo mani nzeleri lizu, Mungu mani azini Opi mani!

²⁴Yehova Mungu mani la, mi li e’yo mani onyi mini vusi; mi ku yi ma ogu yini ma ndelerisi ku fo!

²⁵Mi ku yi ma ’yo yi asia ku kini, Ha! Ha! ama le e’yoni ma ovu ’dini fo! Mi ku yi ma ’yo ku kini, Ama ki di eri pi ’bo!

²⁶Te mi fe ’ba ovupi ayikosi candi mani ma e’yosi ’diyi ma isu drinza, yi ma oja yi toko dria tualu! Mi fe ’ba engapi ma ruaa afusi ’diyi ma su drinza bongole inzitaako be!

²⁷Mi fe ’ba e’yo mani adaruri epi ’diyi ma o’be acece uru ayikosi, ma ovu vini asi ayikorusi indi; ada, yi ma ’yo ’dani, Yehova ma ru ma ovu inzizaru, eri’i ovupi ayikosi ati’bo ini ma drilebasiri!

²⁸Andre mani nga di onyi mini pi ma e’yo olu ani inzita mini be ’dani etu zu.