Read lugbara Zaburi 36 Bible Online

Zaburi 36 - lugbara bible

Zaburi 36

¹Ezata ’ba onzirini ece e’yoni ’dini ma asia kini, Ruta erini Mungu ruzuri eri ma milia yo.

²A’disiku eri enya i i ma milia kini, ’ba ngani e’yo onzi erini ni ku, yi ngani vini e’yo nde ngu onzi ku indi.

³E’yo efupi eri ma tilia ’diyi yi e’yo onzi pi lokiri be; eri ku ondua azini e’yo onyiru ’yezu ja.

⁴Erini laria gbolo dria eri e’yo onzi otu i asia; eri ’ba i ma pa geri ovupi onyiru kuria; eri nguni e’yo onzi onzi ku.

⁵Yiki aleru miniri ovu ’bua uru, Yehova la, asi ada miniri ca kpere ’bua.

⁶Onyi mini ovu ekile oni izuru Munguni’diyile, e’yo liza mini ’diyi ekile yi alirule; Yehova, mi adri ’ba piyi ma ta mba anyapa be.

⁷Leta mini yiki beri ovu afa aje ambosirile ’doni ya, Mungu la! Anzi ’bani yi yi ozi idriru endri mi opilearia.

⁸Afa osoru ovupi jo miniari nga dri fu yi dri ci aga ra, mi nga yi emvu yi ara mini ayikorurisi.

⁹A’disiku yi a’di idriniri ovu mi vu ci; diza miniri ma alia ama nga diza ndre ra.

¹⁰Mi idri yiki aleru miniri ’ba mi nipi ra ’diyivu ’dani fo, mi idri vini onyi mini ’ba asi be kililiru ’diyi vu indi!

¹¹Mi ku ’ba afuru ma pa ma ecea ma vu ku, mi ku ’ba onzi ma dri ma dro ma ku.

¹²’Dale ’ba e’yo onzi ’yepi ’diyi o’de va ’bo, oze yi va okposi, yi ngani ceo engazaru dika ku.