Read lugbara Zaburi 37 Bible Online

Zaburi 37 - lugbara bible

Zaburi 37

¹Asi mini ma oti ’ba onzi ’diyi ma e’yosi ku, azini mi ma ovu ma’yalasi ’ba e’yo onzi ’yepi ’diyi vu ku indi.

²A’disiku ’ba nga yi vu asele mbele, yi nga onyu ase ibiruni onyulerile.

³Mi ma ’ba mi asi Yehovani a’izu, mi ma ’ye e’yo onyiru; mi nga ani adri nyakua e’yo ’yaasi.

⁴Mi ma ovu vini ayikosi Yehova ma e’yosi, eri nga ani e’yo mi asini lele ’diyi fe mini ra.

⁵Mi ku geri mini Yehova dri; mi a’i eri alu indi, eri nga fe e’yo nde ma ’ye i ani.

⁶Eri vini nga fe onyi mini ma e’da dizale, eri nga fe e’yo mini kililiruri ma di ekile etu aga biriri ma dizale,

⁷Mi do mi e’yere Yehova ma drilia, mi te eri dri asi tezasi; mi asi ma oti ’ba drileba isupi geri iniari ma e’yosi ku, ’ba e’yo onzi otule lokiriru ’diyi ’yepiri ma e’yosi ku indi!

⁸Mi ku adra pi aoko be ja! Mi asi ma oti ku; asi otizani ’ba se kiri e’yo onzi ’yezu.

⁹Yini ngale ’ba onzi ’diyi ma dri jalerisi; te ’ba Yehovani tepi ’diyi yi nga angu nya awitaruni.

¹⁰A’disiku ace were ’ba onziri nga ovu yo; ada, mi nga pari erini ega asi driasi ti, te eri nga ovu yo.

¹¹Te ’ba e’yere ’diyi nga angu nyani, yi nga tra ayikosi lonyi asi anzurunirisi.

¹²’Ba onziri e’yo nda ’ba kililiruri ma ruaa, eri sikala nya eri vu;

¹³te Opini nga oguta ogu erisi, erini ndrele kini etu eriniri ’ye eca rarisi.

¹⁴’Ba onzi ’diyi yi nze sei yini, yi nzo osu yini ’bo, ’ba alioru ’bezu va ’ba afa kokoru be, ’ba acipi geri kililirurisi ’diyi ofuzu;

¹⁵te sei yini nga yi ma ngulupi ma asi so, osu yini nga yi onyo ra.

¹⁶Afa were ’ba onyiruni ovuzu eri beri eri onyiru aga ’ba onzi kakau ma lonyi karakarau ’diyi ra,

¹⁷A’disiku yi nga ’ba onzi ’diyi ma wu onyo ra; te Yehovani ’ba onyiru ’diyi edre uruni.

¹⁸Yehova ni ’ba kililiru ’diyi ma o’du ra, awita yini nga ovu ’dani ’dani;

¹⁹yi ngani drinza isu ewu onzirisi ku, ewu likinirisi yi nga mvi ri tra ’dani.

²⁰Te ’ba onzi ’diyi nga dri ja ra; Yehova ma ari’ba yi nga ovu ekile kabiloanzi ma osole, yi nga avi ra-yi nga avi afizu acikale.

²¹’Ba onzini mari nya ra, te ofeni dika ku, te ’ba onyiruri ini ’ye yikisi, afa fezu toko;

²²a’disiku ’ba erini asi ndriza fezu yi dri ’diyi nga angu nya awurusoruni, te yi nga ’ba erini trile ’diyi ma dri ja ra.

²³Acita ’banini pa so kirikiri Yehovasi, eri ovu ayikosi leti erinisi;

²⁴ka tro eri e’de va ti, eri ngani ovu ’bezaru va kai ku, Yehovani eri edrele uru i ma drisirisi.

²⁵Ma ovu ndra karilauru, curu’do ma mbazauru; te ti, engazu drio ma ndreni nga yi ’ba onyiru ku pirini ’dini ku, ma ndreni nga vini anzi erini yini nyaka a’iria ’ba afa a’ipi ’diyile leu indi.

²⁶Etu driasi eri ’ye yikisi, eri mari fe ra, te anzi eri ma oriru ’diyi yi asi ndriza isu ra.

²⁷Mi ku e’yo onzi ja, mi ’ye e’yo onyiru; ka’dini mi nga adri ’dani ’dani.

²⁸A’disiku Yehovani e’yo liza kililiruri le ra; eri kuni ’ba ini alatararu ’diyi ku. Yi ovu ta mbazaru ’dani ’dani, te anzi ’ba onzi ma oriru ’diyi nga dri ja ra.

²⁹’Ba onyiru ’diyi nga angu nya awitaru, yi nga adri alenia ’dani

³⁰’Ba kililiruri e’yo onduaru ’yo i tisini, andre erini adri e’yo liza kililiruri olu’i.

³¹Azita Mungu erinirini ovu eri ma asia ci; pani ngani nzo aluni ku ’dani.

³²’Ba onziri adri ’ba onyiruri ne, geri ndazu eri fuzu.

³³Te Yehova ngani eri ku ’ba nde ma dria ku, eri ngani vini ku e’yoni eri ndezu etu yini eri ma e’yo lizurisi ku.

³⁴Mi te Yehovani, mi ebi mi geri erini ma alia ci, eri nga mi ’ba uru angu nyazu awurusoru ani; mi nga ndre yini ’ba onzi ’diyi ma dri jaria mi milesi.

³⁵Ma ndre ’ba onziri erini ovuria okpo be tu, erini i ajaria walaru pati ibiru angu eri sipiri ma aliarile.

³⁶Te mani vini agaria ’dasi dika, mi ndre, eri de yo; ada, ma nda eri ti, econi eri isuzaru ku.

³⁷Mi ma ama ’ba asi ada beri, mi ma ndre ’ba kililiruri, a’disiku asiza agu nderiniri asi anzuruni.

³⁸Te ’ba ezata ezapi ’diyi nga dri ja tualu; ’ba onzi ’diyi ma asiza eri dri jazani.

³⁹Te pata ’ba kililiru ’diyini enga Yehova vu; eri ovu kali yini yi ta mbazu alenia etu candinisiri.

⁴⁰Te Yehovani yi ma aza ko, eri yi ari ra; eri yi ari ’ba onzi dri, eri vini yi opa ra, yini apale eri vu yi ma ta mbazurisi.