Read lugbara Zaburi 40 Bible Online

Zaburi 40 - lugbara bible

Zaburi 40

¹Ma teo mira Yehovani tezasi; te eri eco ti ma vu, eri eri wuta mani indi.

²Eri enze vini ma ’bile onzikanyaruri ma aliasi amve, orita sezaru ma aliasi indi, eri fe mani pa sozu kata dria, fezu ma pa ageleni nzozu ku.

³Eri ’ba di ongo o’diru ma tilia ’bo, ongo Mungu amani ma rui inzuzuri’i. ’Ba kakau yi nga e’yo ’diri ndre ra, yi nga ru, yi nga asi yini ’ba Yehovani a’izu ani.

⁴’Ba Yehovani ’bapi asi teza iniruri ovu drileba be; ’ba ’diri inzini ’ba afu be ’diyi ma e’yo ku, inzini vini ’ba yi ojapi e’yo inzoru vutia ’diyi ma e’yo ku indi!

⁵Yehova Mungu mani la, ’yeta osutaru mini ’yele ’diyi yi kakau, asisile mini ama vu ’diyi be indi; ’ba econi yi ma kalafe ecezaru mi tia ku! Ma ka te o’bi yi ma e’yo olu kani ’yo, isu de kalafe yini aga ’bani ecole laleri ra.

⁶Edeta edeza pi feni ayiko mi dri afa feza anyafurasi ’diyi be ku; te mi zi ma bile ’bo. Edeta vezaru pi edeta e’yo onzi edezuri be mi leni ’ba ma fe ku.

⁷Etu ndesi ma ’yo ra kini, Mi ndre, ma eca ra; e’yo mani ovu sizaru drio buku enyi trazaniri ma alia;

⁸e’yo mini leleri ’yezuri ayikoni ma dri tu, Mungu mani la; ada, azita mini ovu asi mani ma alia ci,

⁹Ma ekue’yo kililiruri ma e’yo bari okuza amboru ma alia ra; mi ndre, ma ti ngani ku e’yo ’yoko ja ku, Yehova, mi ni ra.

¹⁰Ma a’buni e’yo kililiru miniru, kuzu zizaru ma asia ku, te ma nze asi adaru miniri pi ma e’yo pata miniri be; ma ocini vini yiki mini aleruri pi ma e’yo, e’yo adaru miniri be okuza amboru dri ku.

¹¹Mi ga yiki mini asi ndriza be ’diyi fekokoru ma dri ku fo, Yehova, mi fe yiki mini aleruri ma mba ma ta ci ’dani e’yo adaru miniri be!

¹²Candi karakarau lakokoru ’diyini ma acele kururisi; e’yo onzi mani aga ma ra, ma econi ani luzaru uru ku; yi ovu karakarau aga dribi efi ma dria ’diyi ma kalafe ra; asi mani oga i si,

¹³Mi asi ma le ma pazu fo, Yehova! Mi ’ye mbele ma aza kozu, Yehova la!

¹⁴’Ba ndapi idri mani dri japi ’diyi ma nya drinza, yi ma oja yi tualu afa tokole indi; ’ba ovupi ayikosi candi manisi ’diyi ma mvi vile, yi ma oja yi afa drinzarule!

¹⁵’Ba ’yopi ma tia, Ha! Ha! ’diyi ma adi yi ku pirini drinza isuzu ’de.

¹⁶Te ’ba mi ndapi ’diyi dria alu alu ma ovu ayikosi mi alia nyona be; ’ba pata mini lepi ’diyi ma ’yo ’ dani kini, Yehova ma ovu inzizaru amboru!

¹⁷Te ma’i, ma ovu alioru pirini; te Opini ma e’yo ega ra. Mi’i, mi ovu ’ba ma aza kopiri, ’ba ma aripiri indi; mi ici mi dri ku fo, Mungu mani la!