Read lugbara Zaburi 45 Bible Online

Zaburi 45 - lugbara bible

Zaburi 45

¹Asi mani ga tre e’yo onyirusi, drini ayi va; ma e’yo mani edele opi ma e’yosiri ’yo’i; ma andreri ’ba waraga sipi mbeleruri ma kalamule.

²Mi rua ovu ndrizaru aga anzi ’bani dria ra; osu ’yeta anzutiri mi ma tilia ’bo; e’yo ’disi Mungu fe ani asi ndriza mi dri ’dani ’dani.

³Mi ma su sei mini mi ma opilia, mi ’ba okpo be turi la, diza mini pi inzita mini be indi!

⁴Inzita mini opiniri ma alia mi aga drile drilebaru, e’yo adaru pi ma e’yosi, asi e’yereru pie, e’yo kililiruri pie; mi dri ndiri nga mi imba e’yo uriuriru ’diyi ’yezu!

⁵’Ye mini ma si ndri ndri cizaru ari’ba opini ma asia; ’ba jururu ’diyi e’de va mi palaa.

⁶Mungu la, oguna mini opiniri ovu kpere ’dani ’dani. Kali mini suru dri cezuri ovu kali e’yo kililirurini;

⁷mi le e’yo kililiruri, azini mi ngu e’yo onzi onzi. E’yo ’disi Mungu, Mungu miniri, osu odu ayikoniri mi dria aga mi agyi yi dria ra;

⁸bongo mini dria ngu obiese arikarirusi, ajinguru pisi kasia pie. O’di ndu ndu fe mi dri ayiko engazu jo opi vile ’bani sile ewasisi ’diyi ma alia;

⁹opi ezopi ovu oku mini inzile i ’diyi ma eselia; oku opinirini pa so mi dri ndiria, su mele Ofiriniri i ma ruaa.

¹⁰Mi eri, ma zi la, mi ega e’yoni, mi co mi bile ma vu; mi dri ma avi suru minisi, ’ba mi ati vile akua ’diyi indi;

¹¹ka’dini opini nga mi rua ndriza le ra, a’disiku eri ovu opi mini; mi ma inzi eri;

¹²zamva Turo ezoruri nga ovu ’dale afa feza fezu, ’ba ka tro ovu afa e’iru ’ba ma eselia ti, yi nga asi ndriza mini le be.

¹³Opi zi jo opini ma aliari ovu ndrizaru diza be tu; bongo erini yi ca melesi;

¹⁴’ba nga eri dri ce opi vu bongo yini sole wura ndu ndusiri be eri ma ruaa; yi nga ezoanzi eri ma ezoaziru acipi eri be ’diyi cii mi vu indi.

¹⁵’Ba nga yi dri ce ayikosi ongo ayikoni be indi, yi nga fi opi vile joa.

¹⁶Anzi mini nga ovu mi atapi ma paria; mi nga yi ’ba opiru angu wudrikuru dria ma alia.

¹⁷Ma nga fe ’ba ma ega ru mini kpere a’bianzi vusi dria; e’yo ’disi suru ndu ndu nga awa’difo fe mi dri ’dani ’dani.