Read lugbara Zaburi 46 Bible Online

Zaburi 46 - lugbara bible

Zaburi 46

¹Mungu ovu kali okporu amani ama pazu aleniari, eri ovu okpo amani indi, eri inyiatiri ogogo ama aza kozu candi ma alia.

²E’yo ’dirisi ama ngani ’ye urisi ku, angu ka tro i oja ngoni ti, oni amboru ka tro yi oya miri ma alia ti;

³yi mirini ka wu okposi yini mbule mburisi ti, oni ambo ambo ka ya ya yini tilerisi ti.

⁴Yi ara indi, yi nyiri erini yi ayiko fe aku Munguniri dri, pari alatararu Mungu Uru Agapi Turi ma hemani ovuzuri’i.

⁵Mungu ovu aku nde ma alia; aku nderi nga pa so okporu; Munguni nga eri aza ko ra, adaru eri nga eri aza ko mbeleru tu,

⁶Aoko nya ’ba jururu ’diyi tu, suru oya oya; eri ’yo e’yo i ma o’dukosi, nyaku aka ani yiru. Yehova asikari ongulumuruniri ovu ama be tualu;

⁷Mungu Yakoboniri kali amani apazu aleniari’i.

⁸Emi emu, emi ndre azi Yehovani ’yele ’diyi, eri nyaku eza teketeke ’doni ya.

⁹Eri fe omba ma de i kpere angu ma kalatini asizuria; eri osu nyo ra, eri aju nyo mgbiri, eri gari ombani ’diyi ve acisi!

¹⁰Emi adri ndi, emi ma ni kini ma Mungu’i. Ma nga ovu inzizaru uru suru ndu ndu ma eselia, ma nga ovu inzizaru uru nyakua, ma’i!

¹¹Yehova asikari ongulumuruniri ovu ama be tualu; Mungu Yakoboniri kali amani apazu aleniari’i.