Read lugbara Zaburi 49 Bible Online

Zaburi 49 - lugbara bible

Zaburi 49

¹Emi eri e’yo ’diri, emi suru dria! Emi co emi bile, emi ’ba wudrikuru dria ’diyi,

²’ba soroa ’diyi, ’ba ambo ’diyi be, ’ba afa e’iru ’diyi, ’ba alioru ’diyi be tualu!

³Ma nga e’yo onduaru ’yo ma tisi; ma nga asisile ma asiari dro e’yo vaza ma dria.

⁴Ma nga bile mani co e’yo o’beza erizini; ma nga e’yo vale ku maniri ma efi nze o’di cozasi.

⁵Ma ma ’ye urisi o’du candini ’diyi ma alia a’disi, o’du e’yo onzi ovupi ma paeduarini ma acezu kururisi ya?

⁶’Ba a’ita yini ’bapi lonyi yini ma dria, ovupi afuru yi ma afani ezule trerisi ’diyi;

⁷yi econi adripi yini onzezaru aluani ku, yi econi vini aroti erini ofezaru Mungu dri ku,

⁸(a’disiku orindi yini onzezuri ovu aje be ambo, ’ba econi eri ofezaru kpere ’dani ’dani ku)

⁹’dini eri ma adri idriru ’dani ’dani mazu ku beni.

¹⁰Te eri nga ndre ’ba ka onduaru ti, yi dra ra, ’ba azazaru ’diyi pi ’ba ondua kokoru ’diyi be yi dri ja iritro, afa yini kuzu ’ba azini dri,

¹¹Yi ega yi asia kini yi ma joni nga adri ’dani ’dani, pari yini adrizu alenia ’diyi nga ovu kpere a’bianzi vusi dria. Yi angu yini ma ru ’cia yi ma ngulupi ma rusi.

¹²Te ’ba adrini ’dani inzizaru ku, eri ovu ekile anyapa dri japi ja ’diyile.

¹³Geri yini ’yele ’diri eri aza yini, te ti, yi vutia ’ba nga e’yo yini ’yole ’diyi a’i ra.

¹⁴Ope yi ekile kabilo o’birule fizu Pari ’ba drazaniria; drani nga yi oce ’bani anyapa ocelerile; anguni atiria o’bitisi ’ba kililiru ’diyi nga ovu yi ma drilia opiru; rua ndriza yiniri nga ma Pari ’ba drazaniria, ’dini ’ba ngani pariniri isu dika ku.

¹⁵Te Munguni nga orindi mani onze Pari ’ba drazaniri ma okpo ma aliasi, erini ngale ma a’ile rarisi.

¹⁶Mi ma ovu urisi ku aguni ecazu lonyi be trerisi, afa ka ’ba ga jo erini ma alia trerisi.

¹⁷A’disiku eri ka nga dra ra, eri ngani afa aluni ji i be ku; diza erini ngani si va eri ma vutisi ku.

¹⁸Erini ovuria idriru eri ka tro i enya ayikosi ti, (te ’ba yi mi inzi de mini ovuria drilebaru),

¹⁹eri nga mu i a’bipi vu ra; yi ngani diza ndre dika aluni ku.

²⁰’Ba ’bani inzileri ka ovu ondua be ku, eri ovu ekile anyapa dri japi ja ’diyile.