Read lugbara Zaburi 5 Bible Online

Zaburi 5 - lugbara bible

Zaburi 5

¹Mi co bile e’yo mani ’yoleri erizu, Yehova la; mi iyiki asisile mani droleri indi.

²Mi eri wuta mani wule o’dukosiri, Opi mani, Mungu mani indi, mani e’yo zile mi tiarisi.

³Yehova, mi nga o’duko mani eri o’bitisi ra; o’bitisi ma nga zita mani ede mi vu kilili, ma nga omvitani te mile be.

⁴A’disiku mi ovuni Mungu e’yo onzi lepiri’i ku; e’yo onzi ngani adri mi vile akua ku.

⁵’Ba ambo be ’diyi ngani pa so mi ma milia ku; mi ’ba e’yo onzi ’yepi ’diyi ngu onzi dria ra,

⁶Mi nga ’ba inzo lipi ’diyi dri ja ra; Yehovani ’ba ndapi ari ’bani adapi lokirisi ’diyi ngu onzi.

⁷Te ma’i, yiki aleru mini amborurisi ma nga fi jo mini ma alia, ma nga mi ru inzi dri fezu hekalu mini alatararuri vu mani mi rulerisi.

⁸Mi ce ma dri, Yehova, onyi mini ma alia ari’ba mani ma e’yosi; mi ’ba geri mini kililiru ma drilia.

⁹Eyo ’aovule yi tilia dani yorisi; ale yini ovu dria dria onzi, oliko yini ovu nyadri kule ti be mgborurile, andre yinisi yi ’ba inzi inzosi.

¹⁰E’yo liza mini ma ode yi ra, Mungu; yi ma o’de va e’yo amaza yi ma ngulupinisi; mi ma ’be yi amve ezata yini karakarau ma e’yosi, yini mbule mi ruaa amve ’borisi.

¹¹Te mi fe ’ba apapi mi vu yi pazu ’diyi dria alu alu ma ovu ayikosi, yi ma otre uru ayikosi ’dani mini yi ma ta mbalerisi; mi fe ’ba mi ru lepi ’diyi dria alu alu ma ovu ayikosi mi alia.

¹²A’disiku mi nga asi ndriza fe ’ba kililiruri dri; Yehova la, mi oga eri osu asi odrizasi ekile gomberesirile.