Read lugbara Zaburi 51 Bible Online

Zaburi 51 - lugbara bible

Zaburi 51

¹Mi ovu yiki be ma vu, Mungu la, leta mini yiki beri vusi; mi ini ezata mani, yiki aleru mini asi ndriza be kakau ’diyi vusi.

²Mi oji ma ezata mani ’diyisi alaru teketeke, mi ’ba ma alaru e’yo onzi mani wuzu indi fo!

³A’disiku ma a’i ezata mani ’diyi ra, e’yo onzi mani ovu ma milia ’dani.

⁴Mi vu, ma ’ye e’yo onzi mi vu a’dule, ma ’ye e’yo onzi mi milia; ’dini mi’i, mini e’yo ’yoria, isu e’yo mini ’yoleri ovu adaru, mini e’yo liria, e’yo liza mini, ovu ’yeke.

⁵Mi ndre, ede ma e’yo onzi ma alia, ma andri ti ma pi e’yo onzi be.

⁶Mi ndre, mi le e’yo adaru ma ovu ’ba ma aliani; mi nga ma imba onduani nizu asi zizaruri ma alia.

⁷Mi ’ba ma alaru ediko bisi, ’dini ma nga ovu alaru ani; mi oji ma, ma nga ovu ani emve ndrindriru aga si ’depi oni ma driari ra.

⁸Mi fe ma ma eri ayiko pi oguta be; ’dini fala mini onyole ’diyi nga ovu ani ayikosi beni.

⁹Mi zi mi mile e’yo onzi manisi, mi ini ezata mani dria fo!

¹⁰Mi ’ba asi alaruri ma alia Mungu, mi ’ba orindi ’yekeri ma alia dika indi.

¹¹Mi ’be ma mi miliasi amve ku, mi nze Orindi Alatararu miniri ma driasi ku.

¹²Mi fe pata miniri ma ayiko ma dri dika, mi edre ma orindi ovupi kokorurisi.

¹³Ma nga di ’ba ezapi ’diyi imba geri mini ’diyisi, ’ba e’yo onzi ’yepi ’diyi nga yi asi oja ani mi vu.

¹⁴Mi ari ma, avuari kazu ovuzu ma dria ’dani ku, Mungu la, mi Mungu pata fepi ma driri’i, ma andreni nga ani ongo ngo o’duko urusi onyi mini,

¹⁵Opi la, mi zi ma tile, te ma nga inzita mini ece ani ma tisi beni,

¹⁶Te mi’i, mi leni edeta edeza ku, ka’dini ku ma eco te fe ra; te di, mi ovuni ayikosi edeta vele verisi ku,

¹⁷Edeta Munguni leleri ovu orindi nyozaruri’i; Mungula, mi ngani asi nyozaru otipi e’yo onzisiri ’ba toko ku.

¹⁸Mi ’ye onyiro Zioni vu etu mini lelerisi; mi si abi kaliru Yerusalemuni ’diyi dika.

¹⁹Edeta onyini nga di ani ayiko fe mi drini, edeta vele, kani anyapa vele pi ’dini ’diyi be; etu ’dasiyi nga tiago ofe mi dri pari mini edeta edezuri ma dria. (’Ba ongo dri cepiri dri. Imbata Daudini, o’du Doegi ’ba Edomuarini emuzu e’yo oluzu Saulo ma tiarisi, ’yozu kini, Daudi ca Ahimeleki vile joa ’bo.)