Read lugbara Zaburi 55 Bible Online

Zaburi 55 - lugbara bible

Zaburi 55

¹Mi co bile zita mani erizu, Mungu la; mi zi mi matu ’baza manisi ku fo!

²Mi ega e’yo mani, mi omvi e’yo ma tia indi; ma dri ci ’dile ’dole matu manisi, ma ota candi manisi ota ota,

³o’duko ari’bani ma e’yosi, inzata ’ba onzi ’diyini ma inzazuri ma e’yosi; yini e’yo onzi fele e’dezu ma ruaarisi, yini ma inzale adrasirisi.

⁴Ma asini li tu ma alia, dra ma uri bi ma ’bo.

⁵Uri bi ma rua yaza be, asi otiza uri fepi turi nde ma ra.

⁶Ma ’yo di ra kini, Ma ka te ovu opile be a’balaule ’yeke fo! Ma eco te enga ani, sazu muzu ava lizu.

⁷Ada, ma eco te mu ziri, ma eco te ri roko dria,

⁸ma eco te nzu mbele ma zizu boroko ma alia oli lipi ambo akulukuru ozoo beri ma e’yosi.

⁹Mi ja yi ma dri fo, Opi, mi osa ti ’yoza yini ndu ndu; a’disiku ma ne ’bani e’yo ’yeria atrisi aku amboru ma alia a’di ’diza be.

¹⁰Yi aci aku nde ma ageia etu zu, ini be rra, abi kaliru erini ma dria; ezata pi ovu eri ma alia ’ba ’yezu lokirisiri be,

¹¹e’yo onzi ovu aku nde ma alia; ’ba inzazuri pi kuni cu erini ku ’ba icizu lokirisiri be.

¹²Te ’ba ndra ma o’dapiri eri ari’boni yoka ndra ’dini ma eco ndra e’yo nde a’izaru ra; ’ba ma ngupi onziri engani vini ma ruaani kuka ndra ’dini ma ndra ma zi erisi ra.

¹³Te eri mi’i, ma mvaazituri, ma agyi, agu mani nile turi’i.

¹⁴Ama eci ndra ti onyiru tu; ama ad ndra tualu jo Munguni ma alia, ’ba ongulumuru ma eselia.

¹⁵Onyiru dra ma obi yi mbele; yi ma lu va idriruri Pari ’ba drazaniri ma alia; e’yo onzini ovule Pari yini adrizuria, yi ma eseliarisi

¹⁶Te ma’iruni, ma nga Munguni omve’i; Yehovani nga ma pani.

¹⁷Ondresi, o’bitisi, eru agasi indi ma nga wu asi otaza be; eri nga o’duko mani eri ra.

¹⁸Eci onze orindi mani asi anzurusi etu ’bani engazu ma ruaa ombasirisi, ’ba omba ’dipi ma be ’diyini ovule karakaraurisi.

¹⁹Munguni nga eri ra, nga yi ’ba ele, eri’i adripi ’dani engazu driori’i; eri nga ’ba yi ojapi ku Mungu rupi ku ’diyi ’ba ele,

²⁰Eri ’ba i ma dri omba ’bazu ’ba ovupi asi anzurusi eri vu ’diyi be ra, eri eza aziza eriniri ’bo.

²¹Ti erini ovu nzolonzoloru butale, te asini ombaru; e’yo erini ’yole ’diyi ovu menemene aga odu ra, te ti, yi si sei enzele enyirikoasi ’bo ’diyile.

²²Mi ’be teri mini Yehova ma dria, eri nga mi edre uruni; eri ngani a’i ’ba kililiru ’diyini oyazu ku.

²³Te mi’i, Mungu, mi nga yi osi va ’bile dri jataniria; ’ba ari ’bani adapi ’diyi pi ’ba lokiri be ’diyi be yi ngani ca eli yini ma egalapi aluria ku. Te ma’i, ma nga ma asi ’ba mi a’izu. (’Ba ongo dri cepiri dri: O’duko ongoni omvele A’balau Pati Ziri Ma Driari vusi. Zaburi Daudini. Imba-I tani, etu ’ba Filisitiaa ’diyini eri bizu Gatuarisi.)