Read lugbara Zaburi 57 Bible Online

Zaburi 57 - lugbara bible

Zaburi 57

¹Mi ovu yiki be ma vu, Mungu la, mi ovu yiki be ma vu fo, ma orindini i ta mbale mi vurisi; ada, ma nga ma zi opile mini etia, de nga dri jata ’diri agani ku.

²Ma nga wu Mungu Uru Agapi Turi vu, Mungu e’yo dria ’yepi ma driri vu.

³Eri nga pata ti pe engazu ’bua ma pazu, etu ’ba ma otupi pasi va ’diyini ma o’dazurisi. Munguni nga yiki aleru iniri ma ti pe e’yo adaru iniri be!

⁴dri mani ovu kami ma eselia; ma la va ’ba dipi acile ’diyi ma eselia; anzi ’bani nde ’diyi yi ma si ovu aju pile ’ye be, andre yini ovu sei cizarurile.

⁵Te mi’i, Mungu la, mi ma ovu uru aga ’bu ra! Diza mini ma ovu uru aga angu wudrikuru dria ra.

⁶Yi ’be emba pa mani mbazu; asi mani o’bu iva; yi ga awi ma drilia, te yi ma ngulupi o’de aleniani.

⁷Asi mani so pa kirikiri, Mungu la, asi mani so pa kirikiri! Ma nga ongo ngo, ada ma nga inzita ma ongo ngo

⁸Mi enga, mi orindi maniri Emi enga, emi o’di zaburi ngozuri pi o’di amboruri be! Ma ma ngulupini nga oru o’biti kulakula

⁹Ma nga awa’difo fe mi dri, Opi, ’ba jururu ’diyi ma eselia; ma nga ongo ngo mi ru inzizu suru ndu ndu ma eselia.

¹⁰Yiki ale be minirini ovule amboruri kpere ’buarisi, e’yo ada miniri ca uru kpere ’bua.

¹¹Te mi’i, Mungu la, mi ma ovu inzizaru uru aga ’bu ’ra! Diza mini ma ovu uru aga angu wudrikuru dria ra! (’Ba ongo dri cepiri dri: o’duko ongoni omvele Mi Ja Eri Ma Dri Kuri vusi. Zaburi Daudini. Imbatani.)