Read lugbara Zaburi 66 Bible Online

Zaburi 66 - lugbara bible

Zaburi 66

¹Emi ’ba nyakua ’diyi dria, emi ma ngo ayikosi Mungu dri;

²emi ma ngo uru diza eri ma runiri ecezu; emi fe inzita erini ma ovu diza be

³Emi ’yo Mungu tia kini, Azi mini osutaru uriuriru ’doni ya! Okpo mini amborurisi, ari’ba mini dria nga yi ku pi mi dri,

⁴Wudrikuru driani aga mi inzi; yi nga ongo ngo mi dri, yi nga ongo ago mi ru inzizu.

⁵Emi emu ’yeta Munguni ’yele ’diyi ndre; eri ’yeta osutaru uriuriru ’diyi ’ye anzi ’bani ma eselia.

⁶Eri oja ndra miri angu a’wiruriru; ’ba yi aga ndra ani yi ara ma eseliasi pasi. Pari ’da ma alia ama ovu ndra ayikosi erisi,

⁷Eri ’ba dri ce ’dani okpo Inirisi, mile erini yi suru ndu ndu ni’ba edemararu ma ’ba yi ngulupi uru ku,

⁸Emi fe awa’difo Mungu amaniri dri fo, emi suru ndu ndu ’diyi la, emi fe ’ba ma eri o’duko emini eri ru inzizuri.

⁹Eri’i eri mba orindi amani ma ta idriru, eri kuni pa amanini onzozu ku.

¹⁰Te mi’i, Mungu la, mi o’bi ama ’bo; mi o’bi ama ekile ’bani dahabu o’bilerile,

¹¹Mi ofi ama emba alia ra; mi ’ba teri nzizaru ama dria

¹²mi fe ’ba oru ama drisi ’bo; ama aga aci ma alesi, yi ma alesi indi; te mi eji ama kpere angu lonyi be turia.

¹³Ma nga fi jo mini ma alia edeta veza be; ma nga afa mani oyoni osole ’diyi ofe mi dri,

¹⁴e’yo nde ndra efupi ma tilia mani ole ma tisi, etu mani ovuzu candi ma aliarisiri’i.

¹⁵Ma nga anyapa osoru ve mi dri edetaru, aji arikariru kabiloago edele edetaru ’diyiniri be; ma nga monie aludu piyi fe ndri be ra,

¹⁶Emi emu e’yoni eri, emi ’ba Mungu rupi ’diyi dria, ma nga e’yo erini ’yele ma pazuri ece ra.

¹⁷Ma wu ndra eri vu ma tisi, ma inzi ndra eri ma andresi.

¹⁸Ma ka ndra e’yo onzi ega ma asia, Opi erini ndra ma ku.

¹⁹Te adaru Mungu eri ’bo; eri co bile zita mani ma o’duko erizu.

²⁰Mungu ma ru ma ovu inzizaru, a’disiku eri ’beni zita mani toko ku, gani vini yiki aleru eriniri feko ma dri si ku. (’Ba ongo dri cepiri dri: o’di cozasi, Zaburini. Ongoni.)