Read lugbara Zaburi 68 Bible Online

Zaburi 68 - lugbara bible

Zaburi 68

¹Mungu ma enga, eri ma ere ari’ba ini ra; ’ba eri ngupi onzi ’diyi ma apa eri ma driliarisi

²Mi ma dro yi ekile olini acika drolerile; ekile oderini akale acisirile, ’dinile indi ma ja ’ba onzi ’diyi dri, Mungu ma milia ra!

³Te ’ba onyiru ’diyi ma ovu ayikosi; yi ma ovu nyonasi tu Mungu ma milia; ada, yi ma ogu tu si emvesi

⁴Emi ma ngo Mungu dri, emi ma ngo ongo inzitani eri ma ru inzizu; emi ma ofa geri ’ba agapi angu ’ba kokoruari dri; eri ma ru YAH’i, emi ma ovu ayikosi nyona be eri ma drilia

⁵Mungu pari erini alatararu ma aliari eri imvoanzi dri ataru, eri awuzi dri e’yo li kililiru.

⁶Munguni adri ’ba kule a’dule ’diyi ’ba ori’ba ma eselia; eri ’ba arujoa ’diyi ofu amve ovuzu drilebaru; te ’ba nibupi eri ma ruaa amve ’diyi adri yini angu yi kokoruria ’dani.

⁷Mungu, ndra mini furia suru mini ma driliaria, mini ndra aciria angu roko driaria,

⁸pari nde Munguni ovuzu indiria angu ya ya, azini ’bu asu i va; ’dale Sinai ya tu Mungu ma milia, Mungu Israeliniri,

⁹Mi’i, Mungu la, andra mi fe ozoo ma ’di fudri; mi fe okpo yila mini dri etu yini andezurisi;

¹⁰’ba mini yi okupi tualu ’diyi adri ndra aleniani; mi Mungu la, onyi minisi mi ede afa ’ba alioru ’diyi dri.

¹¹Opi fe e’yo ma tini; oku e’yo nde ekupi ’diyi yi kakau.

¹²Opi asikari ongulumuru ’diyi ma dri cepi ’diyi apa yini apa apa; te oku tepi akuari eri afa ’bani opale okposi ’diyi awani.

¹³Emi nga la pari kabiloni lazuria ya? Eki a’balau ma opile a’bule dahabusirile, opile erini ekaru melesirile indi.

¹⁴Mungu Okpo be Turi ka opiyi ere’daa, eri e’da ekile o’du ozooni ’dizu si be Zalimoniarile.

¹⁵Oni Basanini eri oni Munguniri; oni Basanini eri oni izuru turi’i

¹⁶Emi oni izuru ’diyi, emi lu oni Munguni lele ovuzu aleniari vu ma’yalasi ’dini a’disi ya? Ada, Yehovani nga adri alenia ’dani ’dani.

¹⁷Mungu ma gari ombani ’diyi yi alifu kali iri, adani alifu alifu; Opi ovu yi ma eselia ekile erini ovule Sinai pari alatararuriarile.

¹⁸Mi tu ’bua ’bo, mi ji ’ba obile ati’baru ’diyi ra, mi a’i afa feza ’ba eselia, ada, ’ba mbupi mi ruaa amve ’diyi ma eselia indi, Yehova Mungu ma adri yi be ani.

¹⁹Opi ma ovu inzizaru, erini e’yo nziza amani ’dule o’du vusi o’du vusirisi; eri Mungu pata amaniri’i.

²⁰Mungu eri ama dri Mungu ’ba aripiri’i; ’ba ofuzu drata ma aliasiri eri e’yo Yehova Opini.

²¹Te Munguni nga ari’ba erini ma dri ogba ra, adaru eri nga ’ba e’yo onzi ’yepi drile drile ’daniri ma dri olubu ga ra.

²²Opi ’yo ra, Ma nga yi omvi engazu Basania, ma nga yi eji dika engazu miri aliru ma aliarisi indi,

²³emi ma su emi pa ari ma alia ani, oce emini ma andre ma isu esele yini ari’ba emini ma ruaa indi.

²⁴Yi ndre acita mini ’bo, Mungu la, acita mini, Mungu mani azini Opi mani, kpere pari alatararuri ma alia-

²⁵’ba ongo ngopi ’diyi mu drile, ’ba o’di copi ’diyi vile, ezoanzi arianzi be yi ma eselia agadua:

²⁶Emi ma inzi Mungu ma ru ’ba yi okupi ’diyi ma eselia, adaru, emi ma inzi Opi, emi efupi yi a’di Israeliniri ma alia ’diyi!

²⁷’Dale Benyamini ganani, opi yini, opi Yudani ’ba ongulumuru yini be, opi Zebulunini ’diyi pi opi Nafutalini ’diyi be.

²⁸Mungu miniri azi okpo fezu mi dri ra; Mungu la, mi ’ba azi mini ’yele ama driri okporu.

²⁹Hekalu mini Yerusalemuari ma e’yosi opi yi nga afa feza eji mi dri ra.

³⁰Mi ma ega anyapa omi talaa ’diyi ma dria, monio o’biru piyi suru ndu ndu ma kojaanzi be. Yi dahabu efi tu pasi va; eri ere suru lepi omba ’bapi ’diyi ra.

³¹Opianzi yi nga efu Misiria ra; Etiopiani nga dri ini eju ndru mbele Mungu vu.

³²Emi ma ngo ongo Mungu dri, emi suru nyakua ’diyi la; emi ma ngo ongo inzitani Opi dri fo!

³³Emi ngo eri’i acipi uru ’bu ’bu drida oku driori ma driari dri; mi ndre, eri e’yo ’yo o’dukosi, o’duko amboru turi’i.

³⁴Emi ma a’i Mungu ovu okpo be; ambo erini opiniri a’bu Israeli ma dri ci, okpo erini ovu ’ba iriti beria.

³⁵Mungu la, mi ’ye ’yeta osutaru ’ba ma ovu urisi ani, engazu pari alatararu mini ma alia; Mungu Israeliniri, eri ruaokpo fe ’ba erini ’diyi dri okpo ecozaniri be. Mungu ma ru ma ovu inzizaru! (’Ba ongo dri cepiri dri: o’duko ongoni omvele Ojofu Asea ’Diyiri vusi. Zaburi Daudini.)