Read lugbara Zaburi 69 Bible Online

Zaburi 69 - lugbara bible

Zaburi 69

¹Mi pa ma, Mungu la! Yi tizani file kpere orindi mani vurisi.

²Ma aba orita aliru ma alia aba aba, pari pa sozurini ovuzu yoria; ma fi yi aliru ma alia ’bo, pari yi tizani ma dri a’buzuria.

³ande wuta manisi ra; ma olikoni ’wi to to. Ma ga Mungu mani ma mile ti, ma mileni ande ande.

⁴’Ba ma ngupi toko e’yo kokoru ’diyi ovu kakau aga dribiefi ma dria ’diyi ma kalafe ra; ari’ba mani lepi ma dri api te ma ’yeni yi onzi ku ’diyi, yi okporu tu. Ma ma omvi di yi dri afa mani ’dule kuri’i ya?

⁵Mungu la, mi ni aza mani; e’yo onzi mani ovuni zizaru mi milia ku.

⁶’Ba mi tepi ’diyi ma ovu drinzasi e’yo manisi ku fo, Opi Yehova asikari ongulumuruniri la; ’ba mi ndapi ’diyi ma isu drinza ma ma e’yosi ku, mi Mungu Israeliniri la.

⁷A’disiku ’ba ega ma dria e’yo minisi, ma andretini drinza be tu.

⁸Ma oja ma ovuzu ekile ani’bole adripi mani ma milia, ma ovu ’ba ururu ayiaanzi mani dri.

⁹A’disiku; mini ma avani ma va tu, o’data ’bani mi o’dazu ’diyi o’de ma ngulupi ma ruaa

¹⁰Ma ka wu mindresi, ma ka ma asi ’ba candiru nyaka ’dazu, ’ba oja e’yo nde ma dri o’dataru.

¹¹Mani koliba suria bongoru, yi e’yo mani ndro ajidimararu.

¹²’Ba ripi kalitilea ’diyi yi ma ru ’yo, ’ba atipi ewasi ’diyi yi ma ngo ongo saarusi,

¹³Te ma’i, ma e’yo zi mi tia, Yehova; etu ’yekerisi, Mungu la, yiki aleru mini karakaraurisi, mi omvi e’yo ma tia pata mini ma e’yo adarisi.

¹⁴Mi pa ma engazu orita ma alia, mi ku ma abazu alenia ku; mi ari ma ’ba ma ngupi onzi ’diyi ma dria, engazu yi aliru ma aliasi.

¹⁵Mi fe yi tiza ma aga ma dria ma a’buzu ku, mi fe yi aliru ma ki ma ku, mi fe ’bile aliruri ma opi i ma ti ma dria ku.

¹⁶Mi omvi e’yo ma tia, Yehova, yiki mini ale berini ovule onyirurisi; mi oja mi ma vu yiki mini asi ndriza be karakarau ’diyi vusi.

¹⁷Mi zi mi mile ati’bo mini gazu ku; mani ovule candi be turisi, mi omvi e’yo ma tia mbeleru.

¹⁸Mi esi mi orindi mani vu ogogo, mi onze ma, mi ofe aroti ma onzezuri ari’ba mani ma e’yosi!

¹⁹Mi ni o’data ’bani ma o’dazuri ra, drinza mani isuleri inzitaako mani be; ari’ba mani dria ovu mi milia.

²⁰O’data nye ma asi ’bo, ma asi nzi candisi tu. Ma nda ’ba yiki beni, te ’baliari ’dinini yo; ma nda ’ba ma asi omipini ti; te ma isuni aluni ku.

²¹Yi fe oji draza ma dri nyaka ma paria, yi avijo manisi, yi fe ma dri patiefi su drazaru mvuzu.

²²Mi oja mesa yini yi ma driliari gbagbaru; eri ma oja i yi dri vuluvuluru, etu yini ovuzu asi anzurusiri

²³Mi obi yi mile ci, yi kazu ndrezo ku; mi fe opile yini ma ya ya ’dani.

²⁴Mi osu aoko mini yi ma dria, mi fe adra mini aciruri ma nde yi ra.

²⁵Mi fe pari yini adrizu aleniari ma ovu andruru, mi fe ’ba aluni ma adri hema yini ma alia ku.

²⁶Yini ’ba mini cole ’bori inzale rarisi, yi e’yo ndro ’ba mini coleri ma rua suza ma e’yosi.

²⁷Mi o’ba e’yo onzi azini, e’yo onzi yini ma dria; mi fe yi ma fi onyi mini ma alia ku.

²⁸Mi ini yi ma ru buku ’ba idriru ’diyiniri ma aliasi; mi si yi ma ru ’ba kililiru ’diyi ma ru be ku.

²⁹Te ma’i, ma ovu alioru azini candiru; mi fe pata mini, Mungu ma ’ba ma uru fo!

³⁰Ma nga ru Munguni inzi ongosi; ma nga eri ru ’ba amboru awa’difosi.

³¹E’yo ’diri nga ayiko fe Yehova dri aga monio fezuri ra, adaru, aga tiago o’yu be onyofi beri fezuri ra.

³²’Ba e’yereru ’diyi ndre e’yo nderi ’bo, yi ovu ani ayikosi; emi Mungu ndapi ’diyi, emi asi ma ovu idriru.

³³Yehovani ’ba afa kokoru ’diyi ma wuta erile rarisi, eri nguni ’ba ini aruru ’diyi onzi ku.

³⁴’Bu pi ma inzi eri nyaku be, miripi afa acipi alenia ’diyi pie dria.

³⁵Munguni ngale Zionini palerisi, erini ngale aku Yudani ’diyi sile ururisi; ati’ba erini ’diyi nga adri ’dale, yi nga angu nde nya yiniru ra

³⁶ati’ba erini ma anzi yi nga angu nde isu awita yiniru, ’ba eri ma ru lepi ’diyi nga adri aleniani. (’Ba ongo dri cepiri dri. Zaburi Daudini, ’ba dri kazu avizu ku.)