Read lugbara Zaburi 7 Bible Online

Zaburi 7 - lugbara bible

Zaburi 7

¹Yehova Mungu mani la, ma ’ba ma asi mi a’izu ra; mi pa ma ’ba ma vuti dropi ombasi ’diyi dri dria, mi ari ma indi,

²yi kazu ma idri ocezu kamini ocelerile ku, ma asizu, de isu ’ba ma aripini yo.

³Yehova Mungu mani la, ma ka ’ye ’dini ’bo, e’yo onzi ka ovu ma dri alia ci,

⁴ma ka ndra e’yo onzi ofe ’ba ovupi ma vu asi anzurusiri vu, (adaru ma pa ’ba ovupi ma vu ari’boru e’yo kokoruri ’bo)

⁵ka’dini ’yeke ari’bo ma dro ma vuti, ma bi ma, ada, eri ma tu idri mani va nyakua, eri ma ’ba diza mani va irifura ma alia.

⁶Mi enga fo, Yehova, adra minisi, mi enga mi uru ari’ba mani ovupi adraru ’diyi ma ruaa; mi oru mi e’yo manisi; mi azi e’yo liza fezu ’bo.

⁷Mi fe ’ba ongulumuru suru ndu nduni ma ovu mi ageia; mi emvi ovuzu yi ma drilia uru.

⁸Yehovani suru ndu ndu ma e’yo u kilili; mi li e’yo mani, Yehova la, onyi mani vusi, e’yo adaru ovupi ma aliari vusi indi.

⁹Mi fe e’yo onzi ’ba onzi ’diyini ma asi ra, te mi fe ’ba onyi be ’diyi ma oso pa ci, mini asi ’bani pi o’bile asisile yini berisi, mi Mungu onyi beri’i.

¹⁰Gombere mani ovu Mungu vu, eri’i ’ba asi be kililiru ’diyi opapiri.

¹¹Munguni e’yo ’bani li kililirunini, adaru eri Mungu adra ’yekeri ’bapi etuzuri’i.

¹²’Ba azini ka asi oja ku, Munguni nga sei ini ma si ji ra; de nzo osu ini ’bo, eri ’ba i ngonde.

¹³Isu de ede vini i dri afa drata fepi ’diyi ’bo, eri ede ’ye ini aciru.

¹⁴Mi ndre, ’ba onzi ’ye e’yo onzi osi ra, adaru eri ti ezatani ’bo, eri osi e’yo inzoru indi.

¹⁵Eri ede awi, ga eri ’bo, eri ’de ’bile ini galeri ma alia ra.

¹⁶Ezata erini nga emvi be i ma ngulupi ma dria, e’yo erini ’yele eganasiri nga ’de eri ma ngulupi ma dria.

¹⁷Te ma nga awa’difo fe Yehova dri, ekile onyi erinirini ovulerile, ma nga ru Yehova Uru Agapi Turini inzi ongosi.