Read lugbara Zaburi 71 Bible Online

Zaburi 71 - lugbara bible

Zaburi 71

¹Ma ’ba ma asi mi a’izu, Yehova; mi ku ma drinza isuzu ku fo!

²Mi ari ma onyi minisi, ma nzezu e’yo ewaru ma aliasi; mi co bile ma vu, mi pa ma fo!

³Mi ma ovu ma dri ekile oni okporu mani apazu vunia mani ma ta mbazu alenia dika dikarile. Mi fe azita ma pazu ’bo, mini ovule kata mani azini kali mani okporurisi.

⁴Mungu mani la, mi ari ma ’ba onziri ma dria, ’ba onyi kokoru, asi ndriza kokoruri ma dria indi.

⁵A’disiku mi ovu asi teza mani, ma a’i mi gbu mvaasi, Opi Yehova la.

⁶Mi edre ma uru e’dozu mani osizu ma andri ma opojoasirisi; mi enze ma ma andri ma aliarisi mi’i. Ma nga mi inzi ’dani ’dani.

⁷’Ba karakarau osu masi osu osu; te mi ovu kali okporu mani ma ta mbazu aleniari’i.

⁸Inzita mini pi nga ga ma tilea tre diza mini be etu zu.

⁹Mi ma ’be ma ewu mani cazu mbazaururia ku; mi ma ku ma o’du ma okponi i dezurisi ku fo!

¹⁰A’disiku ari’ba mani yi ma ru ’yo tu, ’ba lepi idri mani fupi ’diyi yi ti eci tualu e’yo amazu,

¹¹’yozu kini, Mungu ku eri ’bo; ama dro vutini eri bizu, a’disiku ’ba ngapi eri aripini aluni yo.

¹²Mungu la, mi ma ovu ma be re ku; Mungu mani, mi ’ye mbele ma aza kozu fo!

¹³’Ba ari’baru lepi ma fupi ’diyi ma isu drinza, ma ja yi dri ra; ’ba ndapi e’yo onzi ’yezu ma ruaa’diyi ma isu o’data pi drinza be fo!

¹⁴Te ma’i, ma nga ovu asi teza be ’dani, ma nga mi inzi nga drile drile.

¹⁵Ma tileni nga onyi miniri pi ma e’yo olu pata miniri be etu zu; ma nini kalafeni ngopi yari ku.

¹⁶Ma nga emu ’yeta okporu Opi Yehovani ’diyi be, ma nga onyi mini ma e’yo ’yo, ada miniri a’dule.

¹⁷Mungu la, mi imba ma gbu mvaasi, te ecazu curu’do ma olu ’yeta mini osutaru ’diyi.

¹⁸Te ada ma ka tro ovu mbazauru ozoforo be dria indi ti, Mungu, mi ku ma ku fo, de nga ma eceni okpo miniri a’bianzi vile ’diyi dri ku, okpo mini amboruri ’ba dria ngapi ecapi ’diyi dri ku indi.

¹⁹Mungu la, onyi miniri vini izuru uru tu; mi’i e’yo amboru ’yepi rari, Mungu, a’di ovu milenini ya?

²⁰Mi’i fepi ndra amani candi okporu kakau ’diyi ndrezuri, mi nga vini ama ’ba idriru dika; mi nga ama enga dika engazu angu valeru nyaku etiariasi.

²¹Mi ere inzita mani aga ra fo, mi oja mi dika ma asi omizu.

²²Te ma’i, ma nga vini mi inzi o’di zaburi ngozurisi e’yo ada minirisi, Mungu mani la; ma nga ongo ngo mi inzizu o’di coza be, mi Mungu Alatararu Israeliniri la.

²³Ma tileni nga oyu ayikosi tu, mani ongo inzitani ngoria mi dri; orindi mani mini onzeleri nga vini oyu ayikosi indio

²⁴Ma andreni nga onyi mini ma e’yo nze etu zu, a’disiku ’ba lepi e’yo onzi ’yepi ma ruaa ’diyi isu drinza, yi oja yi dria tokoru ’bo.