Read lugbara Zaburi 73 Bible Online

Zaburi 73 - lugbara bible

Zaburi 73

¹Adaru Mungu ovu onyiru Israeli vu, ’ba ovupi asi alaru be ’diyi vu.

²Te ma’i, pa mani ’ye yi tru tru, ace were ma pa yi ’ye nzo nzo.

³A’disiku ma ovu ma’yalasi ’ba afu be ’diyi ma e’yosi, mani ’ba onzi ’diyi ma drileba ndreria.

⁴A’disiku dra ma azo yi dri yo; yi rua ovu ’dani okporu.

⁵Yi ovuni candi be ekile ’ba azi ’diyile ku; azo ’yeni yi ’ba azinile ku indi.

⁶Afu yini e’da ani nyorole yi ma ombelea; yi egana su yi ruaa bongole.

⁷Mile yini efu amve yini a’bulerisi, yi ovu afa be tre aga yi ma asini ecole leleri ra.

⁸Yi e’yo ’bani onzo, asi onzi yinisi yi e’yo ’ba inzazuri olu; yi e’yo ’yo afuru.

⁹Yi ’ba yi tile ’bu o’dazu, azini andre yini ad afuru nyakua.

¹⁰E’yo ’dirisi ’ba erini emvi ’dole, yi mvu yi gapi okelea treri teketeke ani.

¹¹Te yi ’yo ra, Mungu ni ngoni ngoni ya? Mungu ovupi Uru Agapi Turi ovu nita be ya?

¹²Te mi ndre, ’ba ’diyi yi ’ba onzi ’diyi; yini ava lile candi kokoru ’danirisi, yi ma afa ezu nyakua tre.

¹³Adaru ma oji ma asi oye, ma oji ma dri alaru mani ovuria e’yo kokoruria.

¹⁴A’disiku ma ovu inzata be etu zu, ma ovu cozaru imbataru o’biti vusi.

¹⁵Ma ka te ’yo kini, Ma nga e’yo ’yo ’dinile ra, te’do ma ’ye mi anzi lokirisi ’bo.

¹⁶Ma ka ndra geri mani e’yo ’diri vazuri ndru, eri ma dri ewaru tu nde ra,

¹⁷de nga ma fini pari alatararu Munguniria asiza yini ma e’yo egazu ku.

¹⁸Adaru mi ’ba yi pari onzokonzoru ma alia ra; mi adri yi o’be va dri jaza alia.

¹⁹Yi ofu di dri jazaru coti ’doni ya! Yi ja dri teketeke urisi ra!

²⁰Ekile oro bini avile ’bani engariarile, ’dinile indi Opi, mini oruria mi nga wura yini ’ba afa tokole mi milia.

²¹Te ma asi ovu candiru, ma asi li tu candisi,

²²ma ovu egata onduaru kokoru aniakosi, ma ovu ndra ekile anyapa asearile mi milia.

²³Te ti, ma ovu nga mi milia ’dani; mi bi ma dri adari ecazu kpere curu’do.

²⁴Mi nga ma dri ce e’yo amaza minirisi, mi nga di ma a’i diza ma alia ndo.

²⁵’Ba azini mani ’bua indi ya, pe lu mi’i a’dule ku ya? Te nyakua ma leni afa azini ku, te kiri mi’i a’dule.

²⁶Rua mani ovu okpo kokoru asi mani be, te Mungu ovu asi mani ma okpo, azini afa maniru ’dani ’dani.

²⁷Te mi ndre, ’ba ovupi mi be re ’diyi nga dri ja ra; mi ja ’ba dria mi kupi ekile oku ali o’bapirini agupi kulerile ’diyi ma dri ’bo.

²⁸Te mani ma esizu Mungu vu ogogori eri ma dri onyiru; ma ’ba Opi Yehova pari mani ma ta mbazu aleniariru ’bo, ma ma ece ani ’yeta mini ’diyi dria.