Read lugbara Zaburi 74 Bible Online

Zaburi 74 - lugbara bible

Zaburi 74

¹Mungu la, mi ’be ama ’dani ’dani a’disi ya? Aoko mini ve aciru kabilo mi vile nyamukoa ’diyi ma ruaa a’disi ya?

²Mi ma ega ongulumu mini, mini jele drio, mini onzele ovuzu ani suru mi ma yilaru ’diyi ma e’yo fo! Mi ega vini oni Zioni pari ndra mini ovuzu aleniari ma e’yo indi!

³Mi ’du pa mini, mi efi pari andruro ’daniria ani; ari’ba yi ’ye onzi tu pari alatararuri ezazu dria dria!

⁴’Ba omba ’bapi mi be ’diyi otre okposi okuza mini ma alia; yi enga bendera yini uru ecetaru.

⁵Yi si yi ekile ’ba ogara engapi uru i pati kakau oceru ogapi ’diyile,

⁶Curu’do yi eza di bau ’bani opale onduasi ’diyi dria, yi ogazu va egoa pisi opaa be.

⁷Yi du pari alatararu miniri ma ti acisi ’bo; yi eza pari mi runi ovuzu aleniari, eri oguzu va kpere nyakua.

⁸Yi ’yo yi ma asia kini, Onyiru ama ma eza yi teketeke ra; angu ’diri ma alia yi eve pari! ’bani yi okuzu Mungu inzizu ’diyi dria dria ’bo.

⁹Ama ndreni eceta amani ku; nabi azini curu’do dika yo, ’ba ama eselia e’yo vapi candini nga ovu ewu ngopi yari aluni yo.

¹⁰Mungu la, ari’boni nga ama ede ewu ngopi ya? Eri nga ru miniri o’da ’dani ’dani ya?

¹¹Mi nze mi dri vile, adaru mi dri ndiri’i, a’disi ya? Mi ma nze eri mi agatiasi, mi ma ja ani yi ma dri ra.

¹²Te Mungu ovu Opi mani ambori’i engazu drio, eri pata ’ye nyaku ma eselia.

¹³Mi awa ndra mini okpo minirisi; mi ogba anyapa ambo ambo miria ’diyi ma dri yi ma alia ’dasi.

¹⁴Mi agba anyapa amboru miriari ma dri kai, mi fe eri ’ba ovupi angu roko dria ’diyi dri zaru.

¹⁵Mi awa ndra yi egapi egari pi yi tiza be; mi fe yi ara ambo ambo ’diyini nzuzu ra.

¹⁶Etuni mini, inini vini mini indi; mi ede diza pi etu be mi’i.

¹⁷Mi o’ba nyaku ma lokiri dria mi’i; mi ’ba eli pi ayi be.

¹⁸Te Yehova la, mi ega e’yo ’diri, kini ari’bo onzo mi e’yo ’bo, suru ondua kokoruri o’da mi ru ra,

¹⁹Mi ku a’balau mini ma idri nguru dri ku fo; mi dri ma avi ’ba alioru mini ’diyi ma idrisi ’dani’dani ku.

²⁰Mi ma ega aziza ma e’yo; a’disiku pari ’ba e’yo onzi ’yepi eganasi ’diyini adrizu alenia ’diyi yi kakau tu nyaku ma pari iniciciru ’diyi ma alia.

²¹Mi ku ’ba ’bani inzale ’diyi ma emvi drinza be ku fo; te mi fe ’ba alioru ’ba afa kokoru ’diyi be ma inzi mi ru.

²²Mi enga, Mungu la, mi me e’yo miniri ma eti; mi ega o’data ’ba ondua kokorurini mi e’dazu etu zuri ma e’yo!

²³Mi dri ma avi ’ba ari’baru ’diyi ma o’dukosi ku, te ’ba engapi mi ruaa ’diyi ma otrezani tu uru ’dani! (’Ba ongo dri cepiri dri: o’duko ongoni omvele Mi Ja Eri Ma Dri Kuri vusi. Zaburi Asafuni. Ongoni.)