Read lugbara Zaburi 77 Bible Online

Zaburi 77 - lugbara bible

Zaburi 77

¹Ma nga wu Mungu vu o’duko manisi, ada ma wu Mungu vu o’dukosi, te eri nga bile co ma vu ra.

²Etu mani ovuzu e’yo ewaru ma aliarisi ma nda Opini; ma eju ma dri inisi, ma kudi ku; ma asi ga dra asi omiza a’ikokoru si.

³Ma Munguni ega, ma asi oti ani; ma wu ani, ma orindini aba aba.

⁴Mi fe mani ovuzu mile be mgboru o’du koza kokoru ’dani; di mani ovu okporu tu, ma econi ani e’yo ’yozaru ku.

⁵Ma ega o’du driowu ’diyi ma e’yo ’bo, eli agapi andra drio ’diyi.

⁶Ma ongo mani ega inisi; ma e’yo osu ma asisi ceni, ma orindini e’yo ndru okposi:

⁷Opini nga ’ba ’be amve’dani ya? Eri ngani ovu asi ndrizasi dika ku ya?

⁸Yiki aleru eriniri avi di ’dani ’dani ya? Aziza erini de i teketeke ’ dani ya?

⁹Mungu dri avi ovozu asi ndriza berisi ya? Aoko oga yiki erini asi ndriza berini ya?

¹⁰Te ma ’yo ra, ’Di okpoako mani; te ma nga eli kakau ovupi Mungu Uru Agapi Turi ma dri ndiria ’diyi ma e’yo ega.

¹¹Ma nga ’yeta Yehovani ma e’yo olu; te ma nga ’yeta osutaru mini ’yele drio ’diyi ma e’yo ega ra.

¹²Ma nga asisile dro azi mini dria ma dria, ma nga ’yeta mini ’diyi ega e’yere.

¹³Geri miniri, Mungu la, ovu pari alatararu ma alia. A’dini Mungu amboru ekile Mungu amanirileni ya?

¹⁴Mi’i, mi Mungu tali ’yepiri’i, mi ece okpo mini ’ba jururu ’diyi ma eselia ’bo.

¹⁵Mi onze ndra suru mini mi wusi, anzi Yakobo pini Yusufu be.

¹⁶Yi mirini ndre mi ra, Mungu la, yi mirini ndre mi, yi ovu ani urisi, yi aliru ya ya indi.

¹⁷Iriti osu ozoo ra; ’bu no no; ’ye mini efu yi erezu ra.

¹⁸Noza mini ma o’duko ovu oliriko ma alia; ovi fe diza angu nyakuari dri; nyaku oya i, ya vini ya ya indi.

¹⁹Geri mini ovu yi mirini ma alia, leti mini yi amboru ma eselia; pamvu mini e’dani ku.

²⁰Te mi ce suru mini ma dri ekile ’bani kabilo o’biru ma dri celerile Musa pi ma drisi Aroni be.