Read lugbara Zaburi 78 Bible Online

Zaburi 78 - lugbara bible

Zaburi 78

¹Suru mani la, emi co bile azita mani vu; emi co bile e’yo efupi ma tiliari erizu!

²Ma nga ma tile zi e’yo o’beza o’bezu; ma nga e’yo drio vale ku ’diyi olu;

³ama eri ndra e’yo nde ’diyi, ama ni ra, ama a’bipi ece ndra ama drini.

⁴Ama ngani e’yo nde ’diyi oci anzi yini dri ku, te ama nga inzita Yehovani pi ma e’yo olu anzi vile ’diyi ma tia, okpo erini pie, ’yeta erini ’yele osutaru ’diyi pie dria.

⁵Te eri ’ba e’yo eti nzeza ci Yakobo ma eselia, eri ede azita Israeli ma eselia, eri azi azita nde ama a’bipi dri, yi ma ece ani e’yo ’diyi anzi yini dri beni;

⁶anzi vile ’diyi ma ni ani e’yo ’diyi ra, adaru anzi yini ngale tile vile ’diyi, yi ma nga vini enga e’yo nde ’diyi oluzu anzi yini ma tia indi,

⁷yi ma ovu asi tezasi Mungusi ani, yi dri ma avi ’yeta Munguni ’diyisi ku, te yi ma mba azita erini ma ta ci;

⁸yi ma ovu ani yi ma a’bipile ku, suru e’yo eripi ku lepi mbupi amveri’i; a’bipi nde ’dayi ’bani ndra yi ma asi onyiru ku, yi ovuni asi adaru be Mungu vuku.

⁹Efiraimu anzipi ka ndra afa ombani o’du osu be ti, yi oja yi vile o’du ombani ’darisi.

¹⁰Yi inzini ndra aziza Munguniri ku, yi ga aciko azita erini ma alia si.

¹¹Yi dri avi ’yeta erinisi ra, ’yeta osutaru tu erini ecele yi dri ’diyi be.

¹²Eri ’ye ndra ’yeta osutaru yi a’bipi ma milia angu Misirini ma alia, angu Zoania ’dale.

¹³Eri awa miri, fe yini agazu eseleniasi, eri fe yi miriarini pa sozu nguluru.

¹⁴Etu vusi eri ce yi dri iritisi, te ini vusi eri ce yi dri diza acinirisi.

¹⁵Eri asi kata angu roko driaria, eri fe yi mvuza yi dri fudri ci ekile engazu yi aliruriarile.

¹⁶Eri fe yi razani efuzu kata ma alia ra, eri fe yi nde ma era va yi ara ambo ambo ’diyile.

¹⁷Te ti, yi mu ndra drile e’yo erini ezazu ’dani, angu roko driari ma alia ’daa yi mbu Mungu Uru Agapi Turi ma ruaasi amve.

¹⁸Yi o’bi Mungu yi asia yini za a’ile li yinisirisi.

¹⁹Ada, yi ’yo ndra e’yo onzi Mungu ruaa, kini, Mungu eco mesa ede va angu roko driaria ra ya?

²⁰Emi ndre, eri co kata, yini egbizu ani okposi, yi raza nde ti tu. Te eri eco enya fe indi ya? Eri nga za fe suru erini dri ra ya?

²¹E’yo ’disi Yehova eri ra, ovu ani adrasi; aci nga ti ko Yakobo ma ruaa, eri nga aoko ’ba Israeli cu;

²²yini Mungu a’ile kurisi, yini asi ’bale pata erini a’izu kurisi.

²³Te ti, eri azi ’bu uru, eri zi ’bu tile ra;

²⁴eri fe manani ’dizu yi dria ozoole, yi ma nyakaru, eri fe yi dri enya ’buari’i.

²⁵’Ba alu alu nya ndra ani enya ’ba okporu’diyiniri; eri fe nyaka yi dri yini ani trazu.

²⁶Eri fe oli ma li ’bua engazu woko etuni efuzuria, okpo erinisi eri ce oli engapi woko uruleruriari ma dri;

²⁷eri fe zani ’dizu yi ma dria irifurale, aria opile be ’diyini orizu kakau ekile cinya miri tiarile;

²⁸eri fe yi ma ’de angu yini hema asozuri ma eselia agadua ’de ’de, pari yini ovuzu ’diyi ma ageia.

²⁹Yi nga di nya ra, yi tra tu; eri fe yi dri afa yini ’yezu linisiri ra.

³⁰Te de nga li yini fini ku, za nderini ovuria nga yi tilia ’dani,

³¹isu aoko Munguni enga yi ma ruaa, eri nga ani ’ba okporu tu agapi yi ma eselia ra ’diyi ofu ra, eri ja karile Israelini ’diyi ma dri ra.

³²Te e’yo ’diyi dria ka yi ’ye ’dini ti, yi eza drile drile ’dani; yi a’ini ’yeta erini osutaru ’diyi ku.

³³E’yo ’disi eri fe yi ma o’duni dezu tokoru, eri fe eli yinini dezu dria uri talasi.

³⁴Eri ka yi ofu ra, yi nga eri ndru ra; yi oja yi asi Mungu ndazu asi driasi.

³⁵Yi ega e’yo Munguni ovuzu yi dri katarori, azini kini Mungu Uru Agapi Turi onze yini.

³⁶Te yi inzi eri inzoru tisi toko, yi li inzo eri dri andre yinisi.

³⁷A’disiku asi yini ovuni onyiru eri vu ku; yi ovuni asi adarusi aziza erini ma vuti bizu ku.

³⁸Te eri’i, yikini gale eri ma alia trerisi, eri wu e’yo onzi yini, eri jani yi dri ku; ada, eri adri aoko ini ku ja pale kakau, eri feni adra i ma asiarini engazu dria dria ku.

³⁹Eri dri avini e’yo yini ovuzu ’ba rua ari be ’diyiru azini oli agapi aga emvipi dika kurilerisi ku.

⁴⁰Yi mbu eri ruaasi amve roko driaria pale kakau ’doni ya! Yi fe candi eri dri angu yi kokoruria pale kakau ’doni ya

⁴¹Yi asi vile, yi o’bi Mungu, yi ’ye aka aoko fezu Mungu Alatarero Israeliniri dri.

⁴²Yi egani eri ma dri ma e’yo ku, egani o’du ndra erini yi onzezu ari’ba yini ma driari ku;

⁴³yi egani eceta ndra erini ecele Misiria ’diyi kani tali erini ’yele angu Zoania ’diyi ku;

⁴⁴e’yo erini yi ara yini ojazu ariru, yi raza yini were ’diyi be, ’bani ani ecozu yi nde mvuzaru kuri’i.

⁴⁵Eri pe onyukonyu pi ma ti yi ma eselia o’biru, yi nyazu, odrukodru pie, yi dri jazu.

⁴⁶Eri fe nyaka kapi yi ma amvuari eriaga dri, eri fe azi yini ngale amvuari ombi dri indi.

⁴⁷Eri eza zabibu pati yini ozoo ’dipi si berisi, eri eza elio pati yini egbe sinisi.

⁴⁸Eri fe anyapa yini odra sisi, anyapa were o’biru ’diyi odra ovi ma acisi.

⁴⁹Eri ’be aoko ini aciruri pi yi ma dria, adra pie, asi veza ini pie, candi pie, yi malaika o’biru e’yo onzi ejipi ’diyi.

⁵⁰Eri fe geri aoko ini dri; eri opani yi ma orindi dra sia ku, te eri fe idri yini azo muani dri.

⁵¹Eri co ami osipi oko Misiria ’diyi dria ra, yi okpo yini ma esele agapi rari Hamu anzipi ma hema ma alia.

⁵²Te eri nga di suru ini ofu amve ’bani kabilo ocelerile, eri nga yi dri ce angu roko driaria kabilo o’birole.

⁵³Eri ce yi dri ’yeke, yi ovu ani uri kokoru; re ari’ba yini aba miri ma alia ra.

⁵⁴Eri eli yi angu ini alatataruria, oni erini isule i dri adasi ’doria.

⁵⁵Eti odro ’ba lururu ’diyi yi ma drilia indi; eri awa angu suru nde ’diyini

⁵⁶Te ti, yi o’bi Mungu Uru Agapi Tori ra, yi mbu eri ma ruaasi amve, yi inzini e’yo eti nzeza erini ’diyi ku,

⁵⁷te yi asi vile, yi ’ye lokirisi yi ma a’bipini ’yelerile; yi oja yi kalaa osu ’ye gbipi kilili kurile,

⁵⁸Te yi fe aoko eri dri aka pari yini uruleru ’diyisi; yi fe eri ovu ma’yalasi wura opale opa yini inzile ’di yisi.

⁵⁹Mungu ka e’yo ’diri eri ra, eri ovu adrasi, eri ngu ani Israeli onzi tu.

⁶⁰E’yo ’disi eri ku bere Siloari ra, hema erini ’bale ’ba ma eseliari’i;

⁶¹eri fe ’ba ma ii okpo iniri ati’boru, eri fe diza iniri ari’ba dri.

⁶²Eri fe suru ini sei dri indi, eri ovu adrasi suru i ma yilaruri be.

⁶³Aci eve karile yini ra, yi ngoni ongo ayikoru amurua yini ma omua ko.

⁶⁴’Ba yini edeta edepi ’diyi odra sei sia, awuzi yini gani lulu ku.

⁶⁵Te Opi nga di enga ekile ’bani engale o’duarile, ekile ’ba okpotuni otrele ewasirile.

⁶⁶Eri nga di ari’ba ini dro vile; eri fe yi ma nya drinza ’ dani ’dani.

⁶⁷Eri ga Yusufu ma hema si, eri peni suru Efiraimuni ku;

⁶⁸te eti pe suru Yudani ti,oni Zionini erini leleri’i.

⁶⁹Eci si pari ini alatararuri uru oni Izurele, ekile nyaku erini ’bale ma adri ’dani ’danirile,

⁷⁰Eri pe vini Daudini Ovuzu ati’bo iniri indi, eri nze eri lico kabiloni ma eseliasi;

⁷¹eri ji eri erini de ovuria kabilo andripi anzi be ’diyi ma vutia, eri ma oce ani suru erini Yakoboni ra, ma oce vini Israeli eri ma yilaru ’diyi indio

⁷²Eri nga di yi oce asi adaru iniri vusi, eli ce yi dri, dri ini ma onduasi indio.