Read lugbara Zaburi 80 Bible Online

Zaburi 80 - lugbara bible

Zaburi 80

¹Mi Israeli Ocepiri la, mi cobile, mi Yusufu ma dri cepi ’bani kabilo o’biro ma dri celerileri’i! Mi ripi kerubi ma eseliari, mi fe diza mini ma di

²Efiraimu pi ma milia Benyamini pie Manase pie! Mi enga okpo miniri, mi emu ama pa

³Mi oja ama dika fo, Mungu; mi fe andreti mini ma di ama vu, ama nga ovu ani pazaru beni!

⁴Yehova Mungu asikari ongulumuruniri la, mi nga ovu aokosi zita ’ba mini ’diyini zilerisi ewu ngopi ya?

⁵Mi fe enya mindreniri yi dri nyazu ’bo, mi fe vini mindre yi dri yi mvuzale ambo fudri.

⁶Mi fe ’ba ama aku ejelea ’diyi agata ba amasi; ari’ba amani yi ama ogu yi ma eselia ogu ogu.

⁷Mi eja ama dika fo, Mungu asikari ongulumuruniri la; mi fe andreti mini ma di ama vu, ama nga ovu ani pazaru beni!

⁸Mi e’du ndra zabibu pati engazu Misiria; mi dro ’ba jururu ’diyi, mi isi eri ani ra,

⁹Mi ede pari eri dri; ola erini fi va aliru nyakua, eri ra angu nde ma alia dria.

¹⁰Endri erini a’bu oni izuru ’diyi ma dri ci, arakala erini e’da ekile mario Munguni’diyile;

¹¹arakala erini zo cazu kpere miri tia, idiza erini cazu Yi Araa.

¹²Mi onyo kali eri ma ageiari va ’ba dria agapi geria ’diyini efini tizu ani a’di e’yosi ya?

¹³Ezo oce talaari eza eri ra, anyapa asea ’diyi nya eri ra.

¹⁴Kirikiri mi oja mi dika fo, Mungu asikari ongulumuruniri la! Mi lu engazu ’bua, mi ndre, mi andri zabibu pati ’dori,

¹⁵pati i’diza mi driadarini i’dile, arakala mini ’bale okporu mi ngulupiniruri’i.

¹⁶Ve eri acisi ’bo, ga eri va ’bo; yi dri ja, mini egale yi dria mi milesirisi!

¹⁷Dri mini ma ovu agu mi dri adariari ma dria, mvi ’bani mini ’bale okporu mi ma ngulupiniruri’i!

¹⁸Ka’dini ama ngani di asi vile mi kuzu ku; mi ’ba ama idriru dika, ama nga ani mi ru omve beni

¹⁹Mi oja ama dika, Yehova asikari ongulumuruniri la; mi fe andreti mini ma di ama vu, ama nga ovu ani pazaru beni! (Ba ongo dri cepiri dri: o’duko Gitiniri vusi. Zaburi Asafuni.)