Read lugbara Zaburi 83 Bible Online

Zaburi 83 - lugbara bible

Zaburi 83

¹Mungu la, mi adri ciri ku fo; mi adri ndi ku fo, mi ri oye ku,Mungu!

²Te mi ndre, ari’ba mini otre tu; ’ba mi ngupi onzi ’diyi enga yi ma dri ra.

³Yi e’yo otu lokirisi suru mini ezazu; yi e’yo ama tualu ’ba mini ozile ’diyi ’yezu onzi.

⁴Yi ’yo ra kini, Ama emu, onyiru ama ma ja yi dri, suru yini ma de i ani ra; ’ba ma ega ru Israeliniri dika ku!

⁵Yi eci ti tualu e’yo amazu asi alusi; yi aziza azi yi ma eselia mi ruaa-

⁶hema ’ba Edomuni ’diyini, ’ba Isimaelini pie, Moabu pi ’ba Hagarini ’diyi pie,

⁷Gebali pie, Amoni pie, Amaleki pie, Filisitia pi ’ba Turoa ’diyi be;

⁸Asuria eci yi vini yi be; yi ko anzi Lotini ma aza ra.

⁹Mi ma ’ye yi ekile mini Midianini ’yelerile, ekile mini Sisera pi ’yele yi ara Kisonia Yabini berile,

¹⁰’Ba ’diyi odra Enidoria ra, yi ovu ekile wara nyaku dririle.

¹¹Mi fe opi yini ma ovu ekile Orebu pile Zeebu be, ada, opianzi yini dria ma ovu Zeba pile Zalimuna berile;

¹²’ba ’diyi ’yo ndra kini, Onyiru ama ma pa angu Munguni ovuzuri amaniru.

¹³Mungu mani la, mi ’ba yi ekile irifura engapi olirikosirile, ekile anyadrileko olini drolerile.

¹⁴Ekile acini angu oceru velerile, ekile acini oni ambo ambo ’diyi ma ti o’balerile,

¹⁵mi ma dro yi akuluku minisi ’dini fo, mi fe yi ma ovu urisi tu angu oliza minisi

¹⁶Mi fe yi ma andreti ma ove dria drinzaru, yi ma nda ani ru mini beni, Yehova la.

¹⁷Mi fe yi ma ovu drinzasi azini asi otiza be ’dani ’dani; ada, yi ma oja yi toko, yi ma ja dri ra.

¹⁸Yi ma ni ani kini mi’i a’dule, omvele Yehova’iri, mi ovu Mungu Uru Tu angu wudrikuru dria ma driliari’i. (’Ba ongo dri cepiri dri: o’duko Gitiniri vusi. Zaburi Kora anzini.)