Read lugbara Zaburi 84 Bible Online

Zaburi 84 - lugbara bible

Zaburi 84

¹Bere mini ovu ndrizaru tu ’doni ya, Yehova asikari ongulumuruniri la!

²Asi mani le irii Yehovani avasi, ada, asi mani aba ava e’yosi aba aba; asi mani pi otre Mungu idriruri vu rua mani be.

³Kolikoli isu jo ini ra, ada, elirika si jorovu i dri ’bo, anzi ini ocezu; ada yi isu pari yini pari ’bani edeta edezu mi driria, Yehova asikari ongulumuruniri la, Opi mani ambori azini Mungu mani.

⁴’Ba adripi jo minia ’diyi yi drilebaru, yi kuni mi inzizu ja ku

⁵’Ba okpo yini isupi mi vu ’diyi yi drilebaru, ’ba ovupi geri be yi asia yi ejizu Zionia ’diyi.

⁶Yini agaria e’bu Wuta Beria yi nga eri oja pari yini a’dizutiro; ada, elozooni ’di drinia asi ndriza be.

⁷Yi ma okponi zo drile drile; yi adri yi e’da dria alu alu Mungu ma milia Zionia.

⁸Yehova Mungu asikari ongulumuruniri, mi eri zita mani; mi co bile fo, Mungu Yakoboniri!

⁹Mi Mungu gombere amaniri la, mi ndre; mi lu ati’bo mini odu osule driniari ma mile!

¹⁰A’disiku o’du alu ’bani ovuzu irii mini ma aliari ovu onyiru aga 0’du alifu alu pari azinia ’diyi ra. Ma eco te ovuzaru ’ba Mungu mani ma jotile ma agei tepiriru aga mani adrizu ’ba onzi ’diyi ma hema ma aliari ra,

¹¹A’disiku Yehova Munguni ovule etuni azini gomberenirisi; Yehovani nga asi ndriza fe diza be ra. Eri ngani ’ba acipi kililiru ’diyi nde afa onyirusi aluni ku.

¹²Yehova asikari ongulomuruniri la, ’ba mi a’ipiri ovu drilebaru! (’Ba ongo dri cepiri dri. Zaburi Kora anzini.)