Read lugbara Zaburi 88 Bible Online

Zaburi 88 - lugbara bible

Zaburi 88

¹Yehova Mungu pata manirini ma wu mi milia etu zu ini be rra.

²Mi fe zita mani ma ca kpere mi ngulupi vu, mi co bile wuta mani erizu fo!

³Candini gale ma asia trerisi, idri manini ’yele sile ogogo Pari ’ba drazani ma tiarisi.

⁴’Ba ma milia ma ovu ekile ’ba sipi va ’bile ma aliarile; ma ovu ekile ’ba okpo kokorurile,

⁵ekile ’ba ’bele ’ba draza ma eseliarile, ekile ’ba fule ra ’bani sale ’bo, mini yi ma e’yo egale dika ku ’diyile; ja yi ma dri ra, co yi rua esele mi dri be ra.

⁶Mi ’ba ma ’bile aliru agapi rari ma alia ’bo, pari iniru azini aliru tu ’diyi ma alia.

⁷Adra mini omi ma va, mi inza ma yi mini mbupi mbu ’diyisi dria.

⁸Mi ’ba agyi mani ma vusi ziri ’bo; mi ’ba ma ovuzu afa ngule onziriru yi dri, Ombe ma ra, ma econi efuzaru ku;

⁹mile mani ondri ondri inzata mani ma e’yosi. Ma ri mi omve 0’du vusi, Yehova la; ma aja ma dri mi vu ra.

¹⁰Mi nga tali ece ’ba draza ’diyi dri ya? ’Ba drapi ’bo ’diyi nga enga mi inzizu ra ya?

¹¹Yi nga leta mini yiki beri ece ’ba draza ma pari ma alia ra ya? Yi ece e’yo mini ovuzu asi adaru beri Dri Jata ma alia ra ya?

¹²Yi nga ’yeta mini osutaru ’diyi ni angu iniru ma alia ra ya? ’Ba nga onyi mini ni angu ’ba drini e’yo avizu aleniaria ra ya?

¹³Te Yehova la, ma wu mi vu ra; o’bitisi zita manini nga ca ri milia ra.

¹⁴Yehova, mi ’be ma a’disi ya? Mi zi mi mile masi a’disi ya?

¹⁵Engazu gbu mvaasi ’ba inza ma ra, ma ovu ogogo dra tia; uri minini ma fuzurisi ma asi oti tu.

¹⁶Adra mini aciruri aga ma dri ’bo; uri mini feleri ja ma dri ’bo.

¹⁷Yi ace ma etu zu ekile yi tizale; yi ace ma kuru.

¹⁸’Ba ma lepiri mi ’ba ma vusi ziri agyi mani be; wa’di mani pie indi angu iniru ma alia.