Read lugbara Zaburi 89 Bible Online

Zaburi 89 - lugbara bible

Zaburi 89

¹Ma nga yiki aleru Yehovaniri ma e’yo ngo ongosi ’dani ’dani; ma nga e’yo ruru ovuzu asi adaru beri eku ma tisi a’bianzi vusi dria.

²Te ma ’yo ra, Yiki alerurini nga zo uru ’dani ’dani, e’yo mini ovuzu asi adaru beri nga pa so ’bua ’dani.

³Ma azi aziza ’ba mani peleri be, ma so oyo ati’bo mani Daudi be ci kini,

⁴Ma nga ori mini ’ba pa sozu ’dani ’dani, azini ma nga oguna mini opiniri si uru a’bianzi vusi dria.

⁵’Buni nga tali mini ’diyi inzi, Yehova la, eri nga e’yo mini ovuzu asi adaru beri inzi okuza ’ba alatararu ’diyini ma alia ra!

⁶A’disiku ’bua ’dale a’dini trotro Yehovaleni ya? Anzi ’ba okporu ’diyini ma eselia a’dini Yehovaleni ya?

⁷Eri Mungu uriuriru tu ’ba alatararu yi okupi e’yo amapi ’diyi driri’i, ’ba ma ru eri tu aga ’ba dria ovupi eri ma ageia ’diyi ra.

⁸Yehova Mungu asikari ongulumuruniri la, a’dini okporu mile, Yah la, ’donini ya? Asi adaru miniri ovu mi ageia ci.

⁹Mi adri opiru afu miriniri ma drilia; yi mirini ka mbu uru mbu mbu, mi adri fe yi nderini ovuzu ndi.

¹⁰Mi agba ndra Rahabuni kai, ekile ’ba fule rarile, mi ere ndra ari’ba mini mi dri okporurisi.

¹¹’Buri mini, nyakuri vini mini indi ; mi o’ba angu wudrikuruni afa gapi alenia ’diyi pie dria.

¹²Mi o’ba ndra kala andraleruri pi kala uruleruri be iri tro; Tabori pi ovu ayikosi ru minisi Herimoni be.

¹³Mi wuri okporu tu; mi driri viru okporu, mi dri ndiri uru tu.

¹⁴Oguna mini opiniri so pa onyi pi mi dria e’yo liza kililiruri be; yiki aleruri pi aci mi drilia e’yo adaruri be.

¹⁵Suru guka awu ayikoniri nipi rari yi drilebaru; ’ba ’diyi aci, Yehova la, andreti mini ma dizasi,

¹⁶ru minirisi yi ovu ayikosi o’du dria, yi nga yi ’ba uru onyi mini ma alia.

¹⁷A’disiku mi’i, mi okpo yini ma dizani; asi ndriza minirisi mi nga ama o’yu ’ba uru,

¹⁸Gombere amaniri Yehova vileri’i, opi amaniri Mungu Alatararu Israeliniri vileri’i.

¹⁹Etu ’ dasi mi olu ndra e’yo afa ndreza ecetarurisi ’ba mini alatararu ’diyi ma tia, ’yozu kini: Ma ’ba aza koza agu azini okporuri vu ’bo, ma ’ba ’ba alu mani pele suru ma eseliari uru ’bo

²⁰Ma isu Daudi ati’bo mani ra; ma osu odu alatararu eri ma dria ’bo.

²¹Ma drini nga ovu eri be okporu, azini ma wuni nga okpo fe eri drini.

²²Ari’ba ngani eri ’ye atrisi ku, agu onziri ngani eri inza ku.

²³Ma nga ari’ba erini oco va eri ma drilia, ma nga ’ba eri ngupi onzi ’diyi ’di ra.

²⁴Te asi ada maniri pi nga ovu eri be yiki aleru maniri be, ru manirisi yi nga o’yu erini enga uru.

²⁵Ma nga dri erini ’ba miri ma dria ra, dri ada eriniri yi raza ma dria indi.

²⁶Eri nga ewala masi kini, Mi ma Ati’i, mi Mungu mani, Oni okporu ma pazuri’i.

²⁷Te ma’ini ma nga eri ’ba ma mvi kayuriru, opiru opi nyakua ’diyi ma drilia uru turiru.

²⁸Ma nga yiki aleru maniri ’ba eri be ’dani ’dani, aziza maniri nga pa so eri be ’dani.

²⁹Ma nga vini ori erini ’ba ovuzu ’dani ’dani, oguna erini indi ekile o’du ’buarini ovule kakaurile.

³⁰Anzi erini ka azita mani ku, ka aci e’yo liza mani ’diyi vusi ku,

³¹yi ka e’yo mani azile ’diyi eza, ka azita mani ’diyi ma ta mba ku;

³²ka’dini ma nga ezata yini ma panga ofe kalisi, ma nga e’yo onzi yini ma panga ofe cotasi;

³³te ma ngani yiki mani nze eri dri teketeke ku, ma ngani fe asi adaru mani ma de i ku.

³⁴Ma ngani aziza mani eza ku, ma ngani vini e’yo efupi ma tilia ’bori oja ku.

³⁵Ma so oyo alatara maniri ma e’yosi iriti ’bo; ma ngani inzo li Daudi dri ku.

³⁶Ori erini nga adri ’dani ’dani, oguna eriniri nga ovu ’dani ma milia etuni ovule ’danirile.

³⁷Ma nga eri ’ba okporu ’dani ’dani ekile mba e’yo eti nzepi ojakokoru ’buarile.

³⁸Te mi ’be ’ba mini odu osule driniari ra, mi ovu eri be adrasi ra.

³⁹Mi ngu aziza mini azile ati’bo mini beri onzi; mi eza oku erini opini inzitaruri eri ’bezu va nyakua ra.

⁴⁰Mi onyo kali tole angu erini ma ageiari dria ’bo; mi asu jo erini okporu ’diyi va andruru ’bo.

⁴¹’Ba dria agapi geria ’diyi yi afa erini opa; eri eca ovuzu ’ba i ma aku ejelea ’diyi dri o’dataru,

⁴²Mi enga ari’ba erini ma dri ndiri; mi fe ari’ba erini dria ovuzu ayikosi.

⁴³Ada, mi oja sei erini vile ’bo, mi feni erini pa sozu omba ma alia kirikiri ku.

⁴⁴Mi fe diza erini ma asi ra, mi gu oguna eriniri va nyakua ra.

⁴⁵Mi li o’du erini ovuzu karilauru ’diyi agadua; mi fe eri nya drinza fudri ci ’bo.

⁴⁶Yehova la, mi nga mi zi ’dani o’du ngopi ya? Adra minini nga ve aciru o’du ngopi ya?

⁴⁷Mi ega e’yo mani ovuzu eli be wereri fo! Mi ’ba anzi ’bani ovuzu olile tokoru ’doni ya!

⁴⁸’Ba ngapi ovupi idriru drata ndrepi ku ma orindi papi Pari ’ba drazaniri ma okpo driri a’di’i ya?

⁴⁹Opi, yiki mini drio mini oyoni sozu Daudi be e’yo adaru minisi ’diyi yi ngoa ya?

⁵⁰Mi ega, Opi, o’data ’bani ati’ba mini o’dazuri; ma’i, ma o’du ma agatia o’data suru dria okporu ’diyini,

⁵¹o’data mi ari’bani ’ba o’dazu, Yehova la, yini ’ba mini odu osule driniari ma pamvu o’dazuri’i.

⁵²Yehova ma ovu inzizaru ewule ewule ’dani ’dani! Amena azini Amena.