Read lugbara Zaburi 9 Bible Online

Zaburi 9 - lugbara bible

Zaburi 9

¹Ma nga awa’difo fe Yehova dri ma asi driasi; ma nga ’yeta mini osutaru ’diyi ma e’yo ece dria ra.

²Ma nga ovu ayikosi, asi mani nga enga ayikoru mi ma e’yosi, ma nga mi ru inzi ongosi, mi’i ovupi Uru Agapi Turi la!

³Etu ma ari’bani yi ojazu mvizu vilerisi yi aba aba, yi dri ja ra mini ovule indirisi.

⁴A’disiku mi fe e’yo maruru pa sozu e’yo liza ma alia ’bo; mi ri oguna opiniri ma dria e’yo lizu kililiru

⁵Mi ega suru ndu ndu ma dria ’bo, mi ja ’ba e’yo onzi ’yepi ’diyi ma dri ra; mi ini vini ru yini ra, yi ma ru ma ovu ’dani ’dani ku

⁶Ari’ba asi ’bo, ku yi a’dule ’dani ’dani, aku mini ogule va ’diyi be; ada, ’ba ngani yi ma e’yo ega dika ku.

⁷Te Yehova ri opiru ’dani ’danini, eri ede oguna opini eriniri e’yo liza fezu ’bo;

⁸eri nga angu wudrikuru ma e’yo li onyi alia, eri nga e’yo liza fe suru ndu ndu dri e’yo kililirurisi.

⁹Te Yehovani nga ovu kali abi be okporuri ’ba ’bani ecandile ’diyi dri indi, kali abi be okporuri etu candini ’diyi ma alia.

¹⁰Te ’ba mi ru nipi ’diyi nga asi yini ’ba mi a’izu, a’disiku engazu drio, Yehova, mi kuni nga ’ba mi ndapi ’diyi ku.

¹¹Emi ma ngo ongo inzita fezu Yehova adripi Zioniari dri! Emi olu ’yeta erini ’yele ’diyi ’ba ma eselia!

¹²A’disiku ’ba ari adaza ma arioti ofepiri eri yi ma e’yo ega ra; wuta alioni wuleri avini eri dri ku.

¹³Mi ovu yikisi ma vu fo, Yehova! Mi lu candi mani isule ’ba ma ngupi onzi ’diyi driri, mi’i ma ’dupi uru dra ma siari,

¹⁴ma ma ece ani inzita mini ’diyi dria, ma ma ovu ayikosi pata mini ma e’yosi Zioni zi ma kalitilia.

¹⁵Suru yi o’de va awi yini gale yi’iri ma alia; emba yini zileri bi yi ngulupi ma pa ra.

¹⁶Yehova fe i ovu nizaru ’ba dri ’bo, eri li e’yo ’bo; bi ’ba onziri azi eri ma ngulupi ma drini ’yelerisi ra.

¹⁷’Ba onzi ’diyi nga mvi Pari ’ba drazaniria ra, adaru suru ndu ndu dria e’yo Munguni avipi ’diyi.

¹⁸A’disiku ’ba dri ngani avi ’ba alioru ma e’yosi ’dani ku, azini e’yo teza ’ba afakokoruni ngani dri ja ’dani ku.

¹⁹Mi enga, Yehova la! Mi fe ’ba ma aga ku; mi ma li suru ndu ndu ma e’yo mi milia!

²⁰Mi fe yi ma ovu urisi, Yehova la! Mi fe suru ndu ndu ma ni kini yi ovu kiri ’bani!