Read lugbara Zaburi 90 Bible Online

Zaburi 90 - lugbara bible

Zaburi 90

¹Opi mi ovu pari amani adriewu vusi dria.

²De nga mi ofuni oni amboru ’diyi ku, de nga mi ’bani nyaku angu wudrikuru be ku, engazu kpere okokele drio cazu kpere ’dani ’dani mi Mungu’i.

³Mi adri ’ba oja irifuraru dika, mi ’yo kini, Emi mvi, emi anzi ’bani!

⁴Te eli alifu alu ovu mi milia ekile etu aje depi ’borile, ekile sawa ini ma alia agapi ’borile.

⁵Mi adri ’ba o’du ekile yi tizani afa o’dulerile; yi ovu ekile o’du kozale, o’bitisi yi ovu ekile ase engapi engarile:

⁶o’bitisi eri zo ibiru; ondresi isu de ’ba vu te eri va, eri onyu onyu.

⁷Te ama dri ja aoko minirisi; adra minisi ama candi isu.

⁸Mi ’ba ezata amani mi milia ra, e’yo onzi amani ’yele ndindiru ’diyi mi andretia indi.

⁹O’du amani dria yi aga adra minirisi, eli amani de yi ekile awu candi tazurini i delerile.

¹⁰Eli amani ma kalafe ba kali aziri, kani ’ba ma okpo ka aga ra yi ba kali aro; te e’yo yini yi ipizuri ba ovuzu kiri azi okporu candi beriru; a’disiku eri afi mbeleru, vutinia ama nga ra muzu.

¹¹Te a’di ni aoko mini ma okpo adra miniri be, ruta mini ’bani ani mi ruzuri vusini ya?

¹²Mi imba ama o’du amani ma kalafe nizu fo, ama ma isu amani asi onduaru ani.

¹³Mi emvi, Yehova la A’dungare ya? Te mi ma oja mi asi ati’ba mini ma e’yosi fo!

¹⁴Mi fe ama ma tra o’bitisi yiki aleru minirisi, ama ma ovu ani ayikosi tu o’du amanisi dria,

¹⁵Mi fe ama ma ovu ayikosi o’du ndra mini ama inzazu ’diyi ma kalafe vusi, eli amani e’yo onzi ndrezu ’diyi ma kalafe vusi indi.

¹⁶Mi fe azi mini ngaleri ma e’da i ati’ba mini ma milia, diza miniri ma e’da i anzi yini vu indi.

¹⁷Mi fe rua ndriza Yehova Mungu amanirini ma ovu ama ruaa, mi fe azi ama dri pamvuari ma so pa okporu ama dri, adaru, mi ma fe azi ama dri pamvuari ma so pa okporu ’dani.