Read lugbara Zaburi 91 Bible Online

Zaburi 91 - lugbara bible

Zaburi 91

¹’Ba adripi pari ndrele ku Mungu Uru Agapi Turiniri ma aliari nga adri Mungu Okpo be Turi ma endria,

²Ma nga ewala Yehovasi, Mi pari mani ma ta mbazu aleniari’i, mi kali mani abi be okporuri indi; mi Mungu mani, ma asi mani ’ba mi a’izu.

³Te eri nga mi pa ’ba aria ewupiri ma kuruso ma alia, azo onzi ndindiani ma alia indi;

⁴eri nga i opile asu mi dria, mi nga mi ta mba eri ma opile ma etia; e’yo adaru eriniri gombereni azini enyini indi.

⁵Mi ngani ovu urisi afa uri fepi inisirisi ku, kani vini ’ye ’bani gbile etusirisi ku,

⁶kani azo ndindiani acipi ’ba obipi angu biza ma aliarisi ku, kani vini dri jata ’ba dri jazu etu agaarisi ku indi.

⁷’Ba alifu alu nga o’de va mi ageia, azini ’ba alifu mudri nga o’de mi dri adaria; te ngani eca mi vu ogogo ku.

⁸Te mi nga lu kiri mi milesi a’dule, mi nga ’ba onzi ’diyi ma panga ndre.

⁹Mi’i Yehova, mi ovu pari mani ma ta mbazu aleniari’i! Mi ’ba Mungu Uru Agapi Tuti angu mini ovuzuriru ’bo;

¹⁰’dini e’yo onzi ngani ani mi isu aluni ku, azo ndindiani ngani eca hema mini vu ogogo aluni ku.

¹¹ A’disiku eri nga malaika erini azi e’yo minisi yi ma mba mi ma ta leti minia dria.

¹²Yi nga mi ’du uru dri yinisi, mi kazu mi pa sizu oni dria ku.

¹³Mi nga ani pa so kami pi ma dria uriohulu be, mi nga kamimva pi ore mi pasi va ara be.

¹⁴Erini ma lele rarisi, e’yo ’disi ma nga eri ari ra; ma nga eri ma ta mba, erini ma ru nile rarisi.

¹⁵Eri ka nga ma omve ra, ma nga e’yo omvi tinia; ma nga ovu eri be e’yo ewaru ma alia, ma nga eri ari ra, inzita fezu eri dri.

¹⁶Ma nga eli erini idri izuru eri ma asini ambizu, ma nga pata mani ece eri dri.