Read lugbara Zaburi 94 Bible Online

Zaburi 94 - lugbara bible

Zaburi 94

¹Yehova,mi Mungu aroti ofeza ma e’ini, mi Mungu aroti ofeza ma e’ini, mi fe diza mini ma efu!

²Mi enga mi, mi nyaku ma e’yo lipiri’i,mi ofe aroti ’ba afuru ’diyi ma ruaa ’yeta yini vusi!

³Yehova, ewu ngopi ya? ’Ba onzi ’diyi nga aga cazu ewu ngopi ya?

⁴Yi e’yo ’yo azenaru, yi e’yo ’yo afuru, ’ba e’yo onzi ’yepi ’diyi dria, yi ipi yi afusi.

⁵Yi ri ’ba mini onyo, Yehova, yi ri yila mini ’diyi inza.

⁶Yi awuzi pi ofu ani’bo be, yi imvoanzi ofu indi;

⁷te yi ’yo ra, Yehova ngani ndre ku; Mungu Yakoboniri ngani e’yoni ega ku.

⁸Emi ega e’yoni, emi ’ba ondua kokoru ’ba ma eselia ’diyi! Emi’i ’ba azazaru ’diyi, emi nga ovu onduaru a’dungare ya?

⁹Eri’i bile ’bapi bi pariari, eri ngani e’yo eri ku ya? Eri’i mile ’bani edepiri, eri ngani afa ndre ku ya?

¹⁰Eri’i suru imbapi cozasiri, eri ngani imba cozasi ku ya? Eri’i onita imbapi ’ba driri’i,

¹¹Yehovani, eri asisile ’bani ni ra, kini yi ovu olile toko.

¹²’Ba mini imbale cozasiri, Yehova la, eri drilebaru, ’ba mini imbale azita minisiri’i,

¹³mi ma fe ani eri ma ovu e’yo ’yaasi o’du candini ma vutia, de nga yi gani ’bile ’ba onzi ’diyi dri ku.

¹⁴A’disiku Yehova ngani ’ba erini ’be ku; eri ngani vini yila erini ku ku;

¹⁵a’disiku e’yo lizani nga i oja dika kililiru, ’ba dria ovupi kililiru yi ma asia ’diyi nga vutini bi ra,

¹⁶A’dini nga enga mani omba ’bazu ’ba onzi ’diyi beni ya? A’dini nga pa so mani ’ba e’yo onzi ’yepi ’diyi ogazuni ya?

¹⁷Yehova ka ndra ovu aza mani kozu ku, te’do orindi maniri fi pari ’bani ovuzu ciriria drio.

¹⁸Etu mani ’yozu kini, Ma pani nzo nzo-risi yiki aleru miniri, Yehova, edre ma uru.

¹⁹Mani asisile mani droria karakarau ma asia, asi omiza mini fe ayiko orindi mani dri.

²⁰Oguna e’yo onzini, e’yo onzi edepi azita fezasiri nga ti eci mi be ra ya?

²¹Yi oku yi tualu ’ba onyiru ’diyi ofuzu, yi nde ’ba e’yo kokoruri e’yo lizasi.

²²Te engazu drio Yehova ovu kali mani abi be okporuri, Mungu mani ovu kata mani mani apazu vuniari’i.

²³Eri omvi e’yo onzi yini be yi ma ngulupi ma dria, eri nga yi dri ja e’yo onzi yini ma alia; Yehova Mungu amaniri nga yi dri ja ra.