Read lugbara Zaburi 95 Bible Online

Zaburi 95 - lugbara bible

Zaburi 95

¹Ama emu, ama ma ngo ongo Yehova dri; ama ma oyu uru o’duko ayikonisi kata pata amanirini vu!

²Onyiru ama ma emu eri ma milia awa’difo be; ama ma oyu uru o’duko ayikonisi eri vu zaburi ngozasi!

³Yehovani ovule Mungu ambonirisi, erini ovule Opi amboru aga Mungu driarisi.

⁴Pari aliru angu wudrikurua ’diyi ovu eri ma dria; oni izuru ma dri mbili ’diyi yi erini indi.

⁵Miri ovu erini, te eri ’ba eri ra; te dri erini ede angu a’wiru indi.

⁶Ama emu, ama ma avu va eri inzizu, ama ma osi kumuti Yehova ama ’bapiri ma milia!

⁷Erini ovule Mungu amanirisi, azini amani ovule ’ba eri vile nyamukoa, kabilo erini ocele dri inisi ’diyi’irisi. ’Ba la, andru emi ka te o’duko erini eri ra ’yeke!

⁸Emi asi ma mba ekile ndra Meribaa, ekile Masaa angu didi ma aliarile ku fo,

⁹o’du emi a’bipini ma obezurisi, yi o’bi ma ra, ndre vini azi mani indi.

¹⁰A’bipi nde ’diyisi ma ecandi ma eli kali su, ma ’yo ra, ’Ba nde yi suru abapi yi asia ’diyi, yi nini nga geri mani ku.

¹¹E’yo ’disi ma so ndra oyo adra manisi ci kini yi ma fi ava liza mani ma alia aluni ku.