Read lugbara Zaburi 98 Bible Online

Zaburi 98 - lugbara bible

Zaburi 98

¹Emi ngo ongo o’diru Yehova dri fo, erini ’yeta osutaru ’yele ’borisi! Dri erini adari wu erini alatararuri be yi ’ye eri dri patani.

²Yehova fe ’ba ni pata ini ’bo, eri ece onyi ini mgboru juru ma milia ra.

³Eri ega yiki aleru eriniri pi ma e’yo, e’yo adaru eriniri be anzi Israelini vu. Pari dria angu ma kalatini asizu ’diyia yi ndre Mungu amani ma pata ’bo.

⁴Emi oyu uru ayikosi Yehova vu, emi ’ba nyakua ’diyi dria; emi e’do ongo ngozu ayikosi ani, adaru emi ma ngo ongo inzitani fo!

⁵Emi ngo ongo inzitani Yehova dri o’di cozasi, o’di pisi o’duko ongo ngozani be!

⁶Guka piyisi o’duko marini be emi ma oyu o’duko ayikonisi Opi ambo Yehova ma milia!

⁷Miri ma wu okposi, afa alenia ’diyi pie dria; nyaku ’ba ovupi alenia ’diyi be indi!

⁸Yi tiza ma sa yi ma dri; oni were ’diyi ma ngo ongo ayikosi tualu

⁹Yehova ma drilia, erini ngale ecale e’yo nyakuni lizurisi. Eri nga wudrikuru ma e’yo li onyisi, eri nga suru ma e’yo li kililiru.