Read lugbara E'yo O'beza 10 Bible Online

E'yo O'beza 10 - lugbara bible

E'yo O'beza 10

¹E’yo o’beza Sulemanini. Mva onduaruri ayiko fe ati dri, te mva ondua kokoruri asi nziza fe i andri dri.

²Lonyi e’yo onzini ma orodri yo, te onyini nga ’ba pa dra sia,

³Yehova ngani a’i abirini ’ba kililiru ’diyi fuzu ku, te eri ngani a’i ’ba onzi ma isu e’yo yini li ’bazuri ku.

⁴’Ba azi ngapi dri ovurusiri nga efu alioru, te ’ba azi ngapi asi driasiri ma drini nga eri ’ba afa e’iru.

⁵Agu afa okupi elisiri eri mva onduaruni, te ’ba o’du kopi ewu anya lozurisiri, eri mva drinza fepiri.

⁶Asi ndrizani adri ovu ’ba onyi beri ma dria, te ’ba onziri zi egana i ma tilea ci.

⁷’Bani ’ba kililiruri ma e’yo egazuri eri drilebani, te ’ba onziri ma runi nga ma ra.

⁸’Ba ondua be i ma asiari nga azita a’i, te ’ba ondua kokoru e’yo ’yopi saaruri nga e’de va.

⁹’Ba acipi kililiruri eri aci e’yo ’yaasi, te ’ba geri be goligoliruri nga i e’da ra.

¹⁰’Ba e’yo bipi i milesiri candini engani, te ’ba ondua kokoru e’yo ’yopi saaruri nga e’de va.

¹¹’Ba onyi beri ma tileri yi a’di idriniri’i, te ’ba onziri zi egana i ma tilea ci.

¹²Ngutani fe agatani efuni, te letani ezata ma dri a’bu dria ci.

¹³’Ba yi ondua isu ’ba e’yo vaza beri ma tilea, te kalisi yi ’ba e’yo vaza kokoruri ma nguku co.

¹⁴’Ba onduaru ’diyi nita ma ta mbani, te ’ba ondua kokoruri ma tileni dri jaza eji ogogoni.

¹⁵’Ba afa e’iru ma lonyi yi aku erini okporuri, te ’ba alioru ’diyi ma alioni eri dri jaza yiniri’i.

¹⁶’Ba onyi beri ma azi ngaza fe dri idri vualeru, te ’ba onziri ma oya fe dri onzi vualeru.

¹⁷’Ba imbata eripiri ovu geri idriniri ma alia, te ’ba e’yo ’bani egazu eri ma driari gapi siri eri aba aba.

¹⁸’Ba nguta zipi i asiari ovu tile be inzoru, te ’ba e’yo onzi ekupi ’ba azi ma ruaari eri ondua kokoru.

¹⁹E’yo ’yole karakarau ’diyi ma alia ezata eceni ku, te ’ba i ti bipi ciri ’ye onduasi.

²⁰’Ba onyiruri ma andreri ekile dahabu onyiru turile; ’ba onziri ma asi si i afa aje be wererile.

²¹’Ba onyiruri ma tileni nyaka fe ’ba kakau dri, te ’ba ondua kokoru ’diyi odra e’yo vaza akosi.

²²Asi ndriza Yehovaniri fe ’bani ovuzu afa e’iru, azini eri o’bani candi asi ndriza nde be aluni ku.

²³E’yo onzi ’yezuri si avitale ’ba ondua kokoruri dri, te e’yo ’yezu onduasiri ovu ’dinile indi ’ba e’yo vaza beri dri.

²⁴E’yo ’ba onzirini ruleri nga eca eri ma ruaani, te yi nga e’yo ’ba onyiru ’diyini asi ’bazu driniari fe yi dri.

²⁵Oliriko ka aga ’bo, isu ’ba onziri ’daa yo, te ’ba onyiruri nga pa so kirikiri ’dani ’dani.

²⁶Ekile patiefi su drazaruni ’ba ma si irilerile, ekile acikani file ’ba ma miliarile, ovuou ovu ’dinile ’ba eri ma ti pepi ’diyi dri.

²⁷Ruta Yehovani ruzuri eri o’du ’bani ere kakau, te yi nga ’ba onzi ’diyi ma eli li aga.

²⁸E’yo ’ba onyiru ’diyini tele asi tezasiri nga ofu ayikoru, te e’yo ’ba onzi ’diyini asi ’bazu driniari nga avi ra.

²⁹Yehovani pari okporu ’ba acipi kililiruri dri, te eri dri jazani ’ba e’yo onzi ’yepi ’diyi dri.

³⁰Yi ngani fe ’ba onyiruni sizu amve ’dani ku, te ’ba onzi ’diyi ngani adri angu ma alia ku.

³¹’Ba onyiruri ma tileni ondua ofu’i te yi nga andre lokarori li, va.

³²’Ba onyiruri ma tileni e’yo ’bani ecole a’ile ’yekeri ni ra, te ’ba onziri ma tini e’yo ’yo ambosi.