Read lugbara E'yo O'beza 14 Bible Online

E'yo O'beza 14 - lugbara bible

E'yo O'beza 14

¹Oku onduaru ’diyi dria si yi ma jo ra, te oku ondua kokoruri anzu eri va i ma ngulupi ma drisi.

²’Ba acipi kililiru e’yo ini ma aliari eri Yehovani runi, te ’ba ’yepi ambosi geri iniari eri Yehovani ’ba aparakaruni.

³’Ba ondua kokoruri ma tilia kali afuniri indi, te ’ba onduaru ’diyi ma tini nga yi ta mba ra.

⁴Pari tini ovuzu yoria lico ovu alaru; te ranya ma okposi nyakani ka tu.

⁵’Ba e’yo eti nzepi adaruri lini inzo ku, te ’ba e’yo eti nzepi inzosiri eri ini inzo ’yo ’i.

⁶’Ba ’ba edepiri ondua nda ti, te nita ovu ewa kokoru ’ba e’yo vaza beri dri.

⁷Mi fu ’ba ondua kokoruri ma miliasi; mi ngani tile nitaniri ama eri ma alia ku.

⁸’Ba ’yepi egatasiri ma onduari geri ini nizu, te onduaako ’ba ondua kokoru ’diyiniri lokirini.

⁹’Ba ondua kokoru ’diyi yi e’yo aliru ’ba ndepiri ’ba aparakaru, te ’ba kililiru ’diyi ma eselia asi ndriza ci.

¹⁰Asi ’bani ni candi ini ra, azini ani’bo ngani fi ayiko erini ma alia ku.

¹¹Yi nga ’ba onzi ’diyi ma jo ogu va, te ’ba kililiruri ma hema nga pa so onyiru.

¹²Geri indi ovupi onyiru ’ba ma miliari, te asizaniri geri dratani.

¹³Ka oguta oguza ma alia ti, asi ’bani ovu candisi, azini ayiko ma asizari asi nzizani.

¹⁴’Ba asipi vile asi ini ma aliari nga ga tre geri inirisi, te ’ba onyiruri nga tra e’yo ini ’yele i’irisi.

¹⁵’Ba ondua kokoruri e’yo dria ’bani ’yole ’diyi a’i a’i, te ’ba ’yepi egatasiri nga geri ini lu e’yere.

¹⁶’Ba onduaruri ovu urisi, nga i ona e’yo onzisi ona ona, te ’ba ondua kokoruri e’yo ’ye ambosi, uri kokoru.

¹⁷’Ba aoko ’bapi mbele mbeleri nga e’yo ’ye ondua kokoru, azini ngu ’ba e’yo onzi otupiri onzi.

¹⁸’Ba e’yo vaza kokoruri nga onduaako a’i awurusoru, te ’ba ’yepi egatasiri nga nita isu oku ndrizarurile.

¹⁹’Ba onzi ’diyi nga avu va ’ba onyiru ma drilia inzitasi, azini ’ba e’yo onzi ’yepi ’diyi nga avu va ’ba kililiru ’diyi ma kalitilea.

²⁰Ka te tro yi ’ba eri ma aku ejelea ’diyi ti, yi ngu ’ba alioru onzi, te’ba afae’iruovuagyi bekakau.

²¹’Ba eri agyini ’bapi edematararuri eza ra, te ’ba yiki ’bapi ’ba alioru vuri eri drilebaru.

²²’Ba e’yo onzi otupi ’diyi yi abani ku ya? Te ’ba nga yiki pi fe ’ba e’yo onyiru otupi ’diyi dri e’yo ada be.

²³Azi dria ma alia orodri indi, te e’yo ’yole tisi tokori eri ’ba ji kiri alio vu a’dule.

²⁴Oku ndrizaru sule ’ba onduaru ’diyi ma driari eri ondua yini, te onyiafa ’ba ondua kokoru ’diyiniri eri onduaakoni.

²⁵’Ba e’yo eti nzepi adaruri eri ’ba opa, te ’ba a’bu ’bupiri fe icimadrini efuni.

²⁶Ruta ’bani Yehovani ruzuri ma alia asi teza okporuri indi, azini anzi erini yi nga ovu pari yini yi ta mbazu aleniari be.

²⁷Ruta Yehovani ruzuri eri yi a’di idriniri, ’ba kazu ’dezu emba drani ma alia ku.

²⁸Diza opini ovu ’ba o’biru erini ’diyi, te opimvani nga dri ja ra ’bani ovule yorisi.

²⁹’Ba aoko ’bapi mbele kuri ovu e’yo vaza be tu, te ’ba aokoni engazu asinia hauri eri e’yo ondua kokoruri ’ba uru.

³⁰Asi anzururi eri idri ruaniri’i, te a’yari eri e’yo falani mazuri’i.

³¹’Ba ’ba alioru inzapiri o’da Mungu eri ’Bapiri, te ’ba yiki ’bapi ’ba afa kokoru vuri fe Mungu dri inzitani.

³²Yi ’be ’ba onziri va e’yo onzi erini ma alia, te ’ba onyiruri ovu e’yo teza be erini draria.

³³Onduani te ’ba ovupi e’yo vaza beri ma asia, te afa ovupi ’ba ondua kokoru ’diyi ma asi aliari adri e’ca

³⁴Onyini suru ’ba uru, te e’yo onzi ovu drinzaru suru dri dria.

³⁵Asi ndriza opini ovu ati’bo ’yepi onduasiri vu, te aoko erini nga ovu ’ba drinza fepiri ma ruaa.