Read lugbara E'yo O'beza 16 Bible Online

E'yo O'beza 16 - lugbara bible

E'yo O'beza 16

¹E’yo otuza asini yi ’bani, te omvita andresiri enga Yehova vu.

²Geri aguni ’diyi dria alaru eri ma ngulupi ma milia, te Yehovani orindi ’bani o’bini.

³Mi ku ’yeta mini ’yele ’diyi Yehova dri, azini eri nga fe e’yo mini otule ’diyi ma ’ye yi ra.

⁴Yehova o’ba afa dria ekile erini otule i ma asiarile; adaru eri ’ba ’ba onzi ’diyi cazu o’du onziri ma tia.

⁵’Ba dria asi be afuru ’diyi yi afa Yehovani ngule onziri; ndi ndi yi ngani ece panga isukokoru ku.

⁶E’yo onzi ovu wuzaru yiki pisi E e’yo ada be, azini ruta Yehovani ruzurisi ’ba yi yi ona e’yo onzisi ona ona.

⁷Geri ’bani ka ovu onyiru Yehova ma milia, eri fe ari’ba ’ba ndeni ’diyi ma ngulupi ovu asi anzurusi eri be.

⁸Afa were e’yo cililiruri beri ovu onyiru aga lonyi amboru e’yo kililiru kuri beri ra.

⁹’Ba ma asini geri ini otuni, te Yehovani aci erini acizuri ma dri ceni.

¹⁰E’yo liza adaruri eri opi ma tilea ti erini ngani eza e’yo liria ku.

¹¹Ratili afa ma nziza o’bipi kililiru ’diyi yi Yehovani; oni nziza dria jurua alia ’diyi yi erini.

¹²Azi onzi ’yezu ovu ’ba opiru ’diyi ma milia afa onzikanyarurile, a’disiku ogunani pa so e’yo onyirurisi.

¹³Tile e’yo kililiru ’yopi ’diyi yi ovu ayikoru opi dri, eri adri ’ba e’yo ’yopi onyiru ’diyi le tu.

¹⁴Aoko opiniri ekile dra ma ojiole, te ’ba onduaruri nga fe e’yoniri ma ambini.

¹⁵Mile ala opiniria idri indi, azini asi ndriza eriniri ovu ekile iriti fepi ozoo ewadrisinirini ’dizurile.

¹⁶Ondua isuzuri onyiru aga mele isuzuri ra ’doni! Ada ’ba ma pe e’yo vaza isuzu’i aga dahabu ra.

¹⁷’Ba kililiruri ma gbokoni i ona e’yo onzisi ona; ’ba i ma geri bipi kilili ’daniri eri i ma idri ma ta mba ra.

¹⁸Afuni fe ’bani dri jani, asi afuruni fe ’bani e’de vani.

¹⁹Eri ovu onyiru ovuzu asi e’yere be ’ba alioru ’diyi be tualu aga afa opale ombaari awazu ’ba afuru ’diyi beri ra.

²⁰’Ba e’yo eripiri nga onyi isu ra, ’ba asi ’bapi Yehova ma driari eri ayiko beni.

²¹Yi nga ’ba asia ondua beri omve ’ba e’yo egapi e’yo vaza beri e’yo ’yoza tilea aluzaruri fe onitani i ereni.

²²E’yo vaza ovu yi a’di idrini egapi egari e’ini dri, te panga ’ba ondua kokoru ’diyini eri onduaakoni.

²³’Ba ondua beri ma asi imba ngulupi ma ti e’yo ’yozu, eri o’ba nita i ma tilea.

²⁴E’yo ’yole ayiko fepi ’diyi ovu ekile anyu anyusoro berile, yi aluzaru orindi dri, eri rua ala feni.

²⁵Geri indi ovupi onyiru ’ba ma miliari, te asizaniri geri dratani.

²⁶Abiri ’ba azi ngapirini nga azi eri drini; a’disiku tile eriniri eri omini.

²⁷’Ba tokoni e’yo onzi otumi, eri ma tilea afa ekile aci afa evepirileri ci.

²⁸’Ba ambo beri agata gaza ereni, ’ba ’ba ndropi oyokolosiri ’ba agyiru tu ’diyi ma esele co ra.

²⁹’Ba ’ba ’yepi eganasiri i ma agyi ma bile ewi, eri ce eri ma dri geri ovupi onyiru kuri ma alia.

³⁰’Ba i ma mile bipi ciri bi i mile e’yo dri fupi kuri otuzu, ’ba i ma ti nzupi ciri fe e’yo onzini i ’ye ra.

³¹Ozoforo eri oku dizani ’ba driari; ’ba nga eri isu adriza kililiruri ma alia.

³²’Ba aoko ’bapi mbele kuri nde ’ba okporuri onyisi ra, te ’ba i ma orindi dri cepiri aga vini ’ba aku ndepi ombasiri ra.

³³’Ba yi odrisi ’be afa awazu, te e’yo lizaniri dria enga Yehova vu.