Read lugbara E'yo O'beza 18 Bible Online

E'yo O'beza 18 - lugbara bible

E'yo O'beza 18

¹’Ba i pepi kalaari eri e’yo i asini leleri nda, eri agata ga okporu ondua kililirurisi dria.

²’Ba ondua kokoruri ovuni ayikosi e’yo vazasi ku, le kiri asi ini ma e’da i.

³’Ba onziri ka emu ra, edematarani emu alu indi; azini afa drinzaruri be o’daza ’ba o’dazuri emu alu indi.

⁴E’yo efupi ’ba ma tilea ’diyi yi ovu yi alirule; yi a’di onduaniri eri yi rapi rarile.

⁵’Ba onzi a’izu avasiri ovuni onyiru ku, azini vini ’ba kililiruri ma e’yo ojazu kalaa e’yo liza ma aliari ovuni onyiru ku indi.

⁶’Ba ondua kokoruri ma tini agata ejini, tile eriniri cota omveni.

⁷’Ba ondua kokoruri ma tiri dri jaza ini, tile ini ovu emba i ma ngulupi mbazuri’i.

⁸’Ba asu supi oyokolosiri ma e’yo ’yoza yi ekile omutibi aluzaru ’diyile, yi fi kpere ’ba ma asia alialeru.

⁹Ada ’ba azi ngapi ovusiri ovu ’ba ’ba dri japiri adripiru.

¹⁰Yehova ma ru ovu kali abi okporurile; ’ba kililiruri nzu alenia, pa i ani.

¹¹’Ba afa e’iru ma lonyi ovu aku ini okporurile, azini ekile abi kaliru izururile i ngulupi ma milia.

¹²De nga ’ba jani dri ku, asi ’bani ovu afuru, te asi e’yereni inzita ejini.

¹³’Ba ka e’yo omvi de nga erini e’yoni ku, eri onduaakoru azini drinzaru eri dri.

¹⁴Azo ruanisi asi ’bani eco tezaru ’ ra, te asi ka i nyoni, a’dini nga ovu asi teza benini ya?

¹⁵’Ba e’yo egapi e’yo vazasiri ma asini nita isuni, azini ’ba onduaruri ma bileni nita ndani.

¹⁶Afa feza ’baniri fe ’bani pari isuni, eri vini eri ji ’ba ambo ambo ’diyi ma milia.

¹⁷’Ba i ma e’yo ma eti nzepi okori e’da i ’ba kililirurile, cazu ’ba azinini emuria e’yo ma eti oziria.

¹⁸Odrisi fe agatani i de ra, eri e’yo li ’ba okporu ’diyi ma eselia.

¹⁹Adripi ’bani ezale vuniari ’ba i asi okporu aga aku okporuri ra; awata ’dinile ’diyi si ekile pati okporu jo okporu ma tilia ’diyile.

²⁰’Ba ma ale nga tra efi kaza i ma tiliarisi; eri nga tra fudri i ma tile ma ’yazasi.

²¹Dra pi idri be ovu okpo andreniri ma palaa, azini ’ba eri lepi ’diyi nga efi kaza erini nya’i.

²²’Ba oku isupiri isu afa onyiruni, eri asi ndriza engapi Yehova vuri a’i’i.

²³Alioni candi ’ba tu, te afa e’ini e’yoni omvi asi okasi.

²⁴’Ba agu o’bapi turi eri ’di ’ye dri jata ejizu i ma ngulupi ma ruaa, te agyi azini i ebipi ’ba ruaa aga adrini rari indio