Read lugbara E'yo O'beza 19 Bible Online

E'yo O'beza 19 - lugbara bible

E'yo O'beza 19

¹’Ba alioru acipi e’yo kililiru iniri ma aliari ovu onyiru aga ’ba e’yo ’yopi ambosi ovupi ondua kokoreri ra.

²Asi ’banini ovuzu nita kokoruri ovuni onyiru ku; ’ba ngiri ngiri ’yepi pasiri aba ra.

³Onduaako ’baniri ka geri ini eza ra eri asi aokoni ’ba Yehova ma ruaa.

⁴Lonyini agu o’ba kakau, te alioni ’ba pi ma esele co agyi be ra.

⁵’Ba e’yo eti nzepi inzosiri ngani ece panga onzi isukokoru ku, azini ’ba inzo lipiri ngani eco apazaru ku.

⁶’Ba kakau aci asi ndriza nda ’ba afa fepi turi dri, azini ’ba dria yi ovu agyiru ’ba afa feza fepi turi be.

⁷’Ba alioru ma adripi yi eri ngu onzi dria; ka’dini agapiri agyi erini ngani yi ere eri ageiarisi ziri aga ra ku ya! Eri bi yi ma vuti e’yo ’yoza be de isu yi yo.

⁸’Ba ondua isupiri i ma ngulupini le’i; ’ba e’yo vaza ma ta mbapiri nga onyi isu.

⁹’Ba e’yo eti nzepi inzosiri ngani ece panga onzi isukokoru ku, azini ’ba inzo lipiri nga dri ja ra.

¹⁰Adrizu afa onyiru nyazu etuzuri sini ’ba ondua kokoruri ku; ka’dini agapiri, sini ’ba ati’boruri opianzi ma dri cezu ku.

¹¹E’yo vaza ’bani fe ’ba nde ma ’ba aoko mbele ku; erini ezata ’bani kuzuri inzita fe eri drini.

¹²Aoko opiniri si ekile kami awule, te asi ndriza erini ovu ekile andrali ase driarile.

¹³Mva ondua kokoruri ovu candi amboru tu i ma ati dri, azini awata okuni awaleri ovu ekile ozoo oyipi ’danirile.

¹⁴’Ba yi jo pi a’i awurusoru lonyi be atapi dri, te oku ’yepi egatasiri eri afa Yehovani feleri’i.

¹⁵Ovuni fe ’bani o’du kozu dikilidiini, azini abirini nga ’ba enza beri fu fu.

¹⁶’Ba azita ma ta mbapiri eri ’di i ma idri ma ta mba, te ’ba i ma geri ma e’yo egapi kuri nga dra ra.

¹⁷’Ba yiki ’bapi ’ba alioru vuri eri ’di mari fe Yehova dri, te eri nga ’yeta onyiru ’ba nderiniri ofe ra.

¹⁸Mi co mva mini imbatasi de nga asi teza indi, te mi ’ba mi asi dri jaza erini ma dria ku.

¹⁹’Ba aoko ’bapi turi nga panga isu raja’disiku mi ka eri ari ra ti, mi ma ari eri etu azinisi dika.

²⁰Mi eri e’yo amaza, mi a’i vini imbata, mi ma ovu ani onduaru ewu drilerisi.

²¹Egata ndu ndu kakau ovu ’ba: ma asia, te e’yo Yehovani otuleniri nga pa soni.

²²’Ba nga ’ba le yiki ’ba nderini vusi, azini ’ba alioruri aga ’ba inzo lipiri onyisi ra.

²³Ruta ’bani Yehovani ruzuri ’ba dri fe idri vualeru, azini ’ba ovupi rota nde beri nga o’a e’yo ’yaasi ’dani; e’yo onzi ngani eca vunia ku.

²⁴Ovuou su i ma dri otekuaa, te eri leni i dri enze omvi i tilia dika ku.

²⁵Mi co ’ba ’ba edepiri, ’ba ondua kokoruri nga e’yo vaza oni ani, mi ega ’ba e’yo vaza beri ma dria, eri nga di nita ma e’yo va ra.

²⁶’Ba i ma atini ’yepi eganasi, vini i ma andrini dropi rari eri mva drinza ejipi o’data fepiri’i.

²⁷Mva mani, mi ku imbata erizu raka mini vini ngazu mi gbuzu e’yo nitani be ndu ndori ja.

²⁸’Ba e’yo eti nzepi saaruri eri e’yo liza ’ba aparakaru, azini ’ba onziri ma tileni e’yo onzi ki pi.

²⁹Ede e’yo liza ngonde ’ba ’ba edepi ede ’diyi dri, ede vini cota ’ba ondua koko ’diyi ma nguku cozu indio