Read lugbara E'yo O'beza 2 Bible Online

E'yo O'beza 2 - lugbara bible

E'yo O'beza 2

¹Ma mvi la, mi ka nga e’yo mani ’yole ’diyi a’i ra, mi ka nga azita mani ’diyi ma ta mba mi asia,

²mi bile cozu ondua vu ani, mi asi fezu e’yo vaza vu ani;

³ada, mi ka nga wu e’yo amaza lezu, mi ka nga mi o’duko enga e’yo vaza omvezu,

⁴mi ka eri nda dahabule, mi ka eri ndru ekile lonyi zile zi’diyile;

⁵mi nga di ruta Yehovani ruzuri ma e’yo va ra, mi nga nita ’bani Mungu nizuri isu indi.

⁶A’disiku Yehovani ondua feni; nita pi efu eri ma tilia e’yo vaza be;

⁷eri mba ondua alaruri ma ta ’ba kililiru ’diyi dri; eri gombereni ’ba acipi kililiru ’diyi dri,

⁸geri e’yo lizaniri ma agei teu ani, ’ba alatararu ini ’diyi ma geri ma ta mbazu indi.

⁹Mi nga di onyi pi ma e’yo va; e’yo liza be, azini e’yo kililiru, adaru geri onyiru dria;

¹⁰a’disiku onduani nga fi mi asia, nitani nga ovu aluzaru orindi mini dri,

¹¹e’yo amazani nga mi agei teni; e’yo vazani nga mi ta mba ra;

¹²yi nga mi ari geri e’yo onziniri ma alia, azini ’ba e’yo lokiriru ’yopi ’diyi ma dria indi;

¹³’ba nde ’diyi ku geri e’yo kililirurini yi ma aci ani geri inini ma alia beni;

¹⁴’ba nde ’diyi ovu ayikosi e’yo onzi ’yezu, e’yo onzi ’yeza ma lokiri fe yi, dri ayiko tu;

¹⁵yi ’ba acipi geri goligoliruri ma alia ’yepi lokirisi leti yinia ’diyi.

¹⁶Yi nga vini mi ari oku saaruri dri, oku mile aci be ’ba inzipi lokirisiri dri;

¹⁷oku nde ku agupi ini eri jepi zanasiri, eri dri avi Mungu mi ma azizasi ra;

¹⁸a’disiku jo erini si va dra vu, geri erini kpere ’ba draza ’diyi vu;

¹⁹’ba mupi eri vu ’diyi ma eselia ’ba emvini aluni ku, yi cani leti idrini ’diyia dika ku.

²⁰Mi ma aci ani ’ba onyiru ’diyi ma geria, mi ma mba ’ba kililiru ’diyi ma leti ma ta.

²¹A’disiku ’ba kililiru ’diyi nga adri angua, ’ba lokiri kokoru ’diyi nga awu alenia ’danini;

²²te yi nga ’ba onzi ’diyi ma dri ja anguasi, yi nga ’ba ’yepi lokirisi ’diyi onze anguasi ra.