Read lugbara E'yo O'beza 20 Bible Online

E'yo O'beza 20 - lugbara bible

E'yo O'beza 20

¹Patiefi su eri agu edematara beri’i, ewa eri agu awata awapi turi’i, ’ba ezapi afa nde ’diyisiri onduani yo.

²Adra opiniri si ekile kami ma awule; ’ba fepi aoko erini ma enga rari eza i ma ngulupi ma idrini.

³’Ba ka i gbu ndu awata lezu ku, ’di ’ba nde dri inzitani, te ’ba ondua kokoru ’diyi dria yi adri yi awa awa.

⁴Ovuou ngani amvu ’ya ewu egbenirisi ku; e’yo ’disi eri nga afa ndru ewu anya lozurisi, te ngani afa isu ku.

⁵E’yo otule ’ba ma asiari eri yi alirule, te ’ba e’yo vaza beri nga yi eko alenia.

⁶Tuni ’ba kakauni nga yi ma ngulupi ma yiki ma e’yo oluni, te a’di eco ’ba asi ada beri isuzaruni ya?

⁷’Ba kililiru acipi e’yo kililiru iniri vusirianzi erini nga ovu drilebaru eri ma vutisi!

⁸Opi ripi oguŋa e’yo lizani ma mi eri e’yo onzi dria ndri i milesi anyadrilekole,

⁹A’di eco ’yozaru, Ma ’ba ma asi alaru ra; ma di alatararu, e’yo onzi mani yo-’dinini ya?

¹⁰Oni afa ma nziza o’bizu ndu ndu ’diyi, okelea ndu ndu ’dinile ’diyi be, yi iritro afa Yehovani ngule onziri.

¹¹Ka ovu mvani ti, eri fe i nizu ’yeta ini ’diyisi, kani e’yo erini ’yeleri ovu ’yeke, kani kililiru yani.

¹²Bile e’yo eripiri, mile afa ndrepiri be, Yehova ’ba yi iritroni.

¹³O’du koza ma va mi tu ku, mi kazu ecazu alioru ku; mi zi mi mile, mi nga tra enyasi ani.

¹⁴’Ba afa jepiri ’yo kini, ’Di afa tokoni, ’di afa tokoni; te ka di mu i ma ’bo, eri ovu afusi afa nderisi.

¹⁵Mele indi, azini nyoro ekaru o’biru; te tile onduaruri nyoro ajeambosirile.

¹⁶’Ba ka le afa fe toboru juru ma paria, mi ma ’du bongo ’ba nderini, mi fe ’ba nde afa toboru fepi jurusiri ma de oyo ini soleri ma e’yo ra.

¹⁷Enya inzoniri alu ’ba dri alu alu, te vilerisi ’ba nde ma tileni nga ga oparafisi tre.

¹⁸E’yo ’bani otule ’diyi yi pa so e’yo amazasi; mini ’yeria omba ’baria, mi ’ye dri ceza onduarurisi.

¹⁹’Ba acipi ’ba azini esupiri eri e’yo zizaru e’da’i; e’yo ’disi mi eci mi agu tile azipi e’yo ’yopi turi be ku.

²⁰’Ba i ma ati pi tripi andri beri, yi nga eri ma tala inyu angu biza iniciciruria.

²¹Awuruso a’ile mbelekocici e’doriari, asizaniri drileba kokoru.

²²Mi ’yo, Ma nga e’yo onzi ma aroti ofe ma’i-’dinini ku; mi ma te Yehovani, eri nga mi pani.

²³Oni afa ma nziza o’bizu ndu ndu ’diyi yi afa Yehovani ngule onziri, afa afa o’bizu lokirisi ’diyi yi onyiru yo.

²⁴Acita ’bani enga Yehova vu; ka’dini agu eco i ma geri vazaru ngoni ngoni ya?

²⁵’Ba ka ’yo mbele egata kokoru, Eri alatararu; te ka oyo so de ’bo, eri di mu e’yo ma eti nda vilerisi, e’yoni nga eri bi ra.

²⁶Opi onduaruri eri ’ba onzi ’diyi ndri anyadrilekole, eri yi odi oni anya dizurisi.

²⁷Orindi ’baniri eri tala Yehovani, eri ’ba ma asi alialeruri ndru teketeke dria.

²⁸Yiki pi mba opi ma tani e’yo adaruri be; oguna eriniri so pa okporu yikisi.

²⁹’Ba karileru ’diyi ma diza eri yi ma okponi; ’ba dezaru ’diyi ma ndriza eri ozoforo yi ma driari.

³⁰Ebi kaliniri adri e’yo onzi ojini; cotani adri ’ba ma asi alialeruri oji indi.