Read lugbara E'yo O'beza 21 Bible Online

E'yo O'beza 21 - lugbara bible

E'yo O'beza 21

¹Opi ma asi ovu Yehova ma dria ekile yi gerile; Munguni tini ona pari ini leleria.

²’Ba ma geri dria yi onyiru eri ma ngulupi ma milia, te Yehovani asi ’bani o’bini.

³Onyi pi ’yezu e’yo kililiruri beri ma e’yo va Yehovani aga edeta edezuri ra,

⁴Mile afururi pi asi afururi be, adani yi ovu ’ba onzi ’diyi ma tala, yi ezatani.

⁵’Ba azi ngapi asi tezasiri ma asisileni ’ba nde ma drile fe kiri lonyi vualeru, te ’ba ’yepi ngiri ngirisiri nga i drile fe kiri alio vualeru.

⁶Lonyi isuzu tile inzorusiri eri apurusa olini drole drorile, azini gbagba dra fepirile,

⁷Egaza ’ba onzi ’diyini nga yi wu ji ku re, yini e’yo kililiruri gale ’yeko sirisi.

⁸’Ba e’yo onzini ndele turi ma geri ovu goligoliru tu, te ’ba alaruri ma azi ovu kililiru.

⁹Eri onyiru ’bani adrizu jo dri senderu ma kala aluria aga ’bani adrizu jo walaru ma alia oku e’yo o’yopi kurukuru turi beri ra.

¹⁰’Ba onziri ma asi le e’yo onzini; ’ba eri ma jo ejeleari isuni asi ndriza eri ma milia ku.

¹¹’Ba ’ba edepiri ka panga isu ra,’ba ondua kokoruri nga ondua isu ra; azini yini ’ba onduaruri Imbaria, eri nga onita a’i ra.

¹²’Ba kililiruri adri ’ba onzi ma jo ma e’yo ega; yi ’ba onzi ’diyi o’be va yi ma dri jazu.

¹³’Ba bile asepi ’ba alioru ’diyi ma wutasi ciri, eri’i eri nga wu ra, te ’ba ngani eri eri ku.

¹⁴Afa feza fele oyokolosiri adri fe aokoni i de ra; vini afa feza ’ba ti razu sule bongo talaa agatiari fe adra okporurini i dezu indi.

¹⁵E’yo liza kililiruri ’yezuri eri ’ba onyiruri dri ayikoru, te ’ba e’yo onzi ’yepiri dri, eri ’dri jatani.

¹⁶’Ba i ojapi kalaa geri e’yo vazaniri kupiri nga o’a okuza ’ba drazaru ’diyiniria.

¹⁷’Ba ayiko nyakuni lepiri nga ovu ’ba alioni; ’ba patiefi su lepi tu odu beri ngani ofu afa e’iru ku.

¹⁸’Ba onziri eri ovu arotiru ’ba onyiruri onzezu; ’ba lokiri beri fi ’ba kililiruri ma paria.

¹⁹’Bani adrizu angu didiari eri ba aga ’bani adrizu oku kurukuru inzamatara fepi turi beri ra.

²⁰Lonyi aje ambosiri odu be yi adri ovu ’ba onduaruri ma joa, re ’ba ondua kokoruri oki iniri de ra,

²¹’Ba onyi ma vuti bipi yiki beri eri adri idri pi isu, onyi pie, inzita pie.

²²’Ba onduaruri eri fi aku amboru ’ba okporu ’diyiniri ma alia geri abi driliarisi, eri anzu afa okporu yini asi ’bazu driniari va.

²³’Ba i ma tile ma ta mbapi i ma andre beri mba ’di i ma ngulupi ma ta e’yo ewaru kazu ngazu i isuzu ku.

²⁴’Ba afuru i enyapi turi, runi Edematara’i; eri adri e’yo ’ye ambosi afuru.

²⁵Ovuou ma e’yo lezani eri fu ra, a’disiku erini gale i ma dri ayuko azi ngazu sirisi.

²⁶’Ba azini indi li ’bapi afasi etu zuri, te ’ba onyiruri adri afa fe, ndeni ’ba ku.

²⁷Edeta ’ba onzirini edeleri eri afa Munguni ngule onziri; ka’dini eri ka eri cii asisile onzisi, ovuni onzi aga ra ku ya?

²⁸’Ba e’yo eti nzepi inzosiri nga dri ja ra, te ’ba e’yo eripiri ma e’yo ’yozani nga pa so ’dani.

²⁹’Ba onziri feni i ma mileni e’dazu drinzaru ku, te ’ba kililiruri adri geri erini ma e’yo ega ra.

³⁰Ondua, kani e’yo vaza, kani e’yo amaza ecopi Yehovani ndepini aluri yo.

³¹’Ba adri akanya ede ku ngonde o’du ombanisi, te e’yo agazaniri Yehovani feni.